20 YANVAR FACİƏSİNİN 20-Cİ İLDÖNÜMÜ SƏBAİL RAYONUNDA GENİŞ QEYD OLUNUR
Bakı, 15 yanvar (AZƏRTAC). Yanvarın 15-də Səbail Rayon İcra Hakimiyyətinin təşəbbüsü ilə rayonda yaşayan 20 Yanvar şəhidlərinin ailələri və faciə zamanı əlil olmuş sakinlərlə görüş keçirilmişdir.
Azərbaycan Vətən Müharibəsi Veteranları Birliyi Səbail rayon təşkilatının Şəhidlər xiyabanında yerləşən və tədbir ərəfəsində əsaslı təmir olunaraq qurumun istifadəsinə verilən qərargahında rayon rəhbərliyi, Yeni Azərbaycan Partiyası (YAP) rayon təşkilatı idarə heyətinin üzvləri, Ağsaqqallar və Veteran Təşkilatları Şurası nümayəndələrinin iştirakı ilə təşkil olunan görüşdə torpaqlarımızın azadlığı və ölkəmizin ərazi bütövlüyü uğrunda həlak olanların xatirəsi bir dəqiqəlik sükutla yad edilmişdir.
Tədbirdə çıxış edən Səbail Rayon İcra Hakimiyyətinin başçısı Asif Əsgərov demişdir ki, bu faciə xalqımızın qan yaddaşına əbədi həkk olunmuşdur. Keçmiş sovet imperiyasının təpədən-dırnağa qədər silahlanmış ordusunun qarşısına silahsız, əliyalın çıxaraq canlarından keçən 20 Yanvar şəhidləri müasir tariximizin qəhrəmanlarına çevrilmişlər.
Faciənin baş verməsində bilavasitə günahkar olan o vaxtkı hakimiyyət nümayəndələrinin hadisəyə hüquqi-siyasi qiymət verməkdən yayındığını qeyd edən icra hakimiyyətinin başçısı, sonradan hakimiyyətə yiyələnən AXC-Müsavat cütlüyünün də bu istiqamətdə heç bir addım atmadığını qeyd etmişdir. Bildirilmişdir ki, məhz ümummilli liderimiz Heydər Əliyev faciənin səhərisi günü həyatını təhlükəyə ataraq Azərbaycanın Moskvadakı nümayəndəliyinə gələrək sovet rəhbərliyinə kəskin etirazını bildirmiş, 1993-cü ildə isə xalqın təkidli tələbi ilə hakimiyyətə qayıtdıqdan sonra onun təşəbbüsü ilə yaradılmış komissiya müvafiq təhqiqat işləri aparmış və 20 Yanvar hadisəsinə hüquqi-siyasi qiymət verilmişdir.
Ulu öndər Heydər Əliyev qanlı faciə zamanı şəhid olanların ailələrinə, əlil olmuş vətəndaşlarımıza diqqət və qayğısını heç zaman əsirgəməmişdir. Onun səyləri ilə faciə qurbanlarının ailələri və 20 Yanvar əlilləri dövlət tərəfindən hər cür diqqət və qayğı ilə əhatə olunmuşlar.
Natiq ölkəmizin azadlığı və müstəqilliyi uğrunda şəhid olmuş və sağlamlığını itirmiş şəxslərə qayğının hər zaman Prezident İlham Əliyevin də diqqət mərkəzində olduğunu qeyd etmişdir.
Bildirilmişdir ki, Səbail Rayon İcra Hakimiyyəti tərəfindən təsdiq olunmuş tədbirlər planına əsasən, faciənin 20 illiyi rayonda geniş qeyd olunur. Rayonun ali təhsil müəssisələrində, orta-ixtisas və orta məktəblərində, idarə və müəssisələrdə xatirə mərasimləri keçirilir. Yanvarın 18-19-da rayondakı bütün orta məktəblərdə keçirilən birinci dərslər qanlı Yanvar faciəsinə həsr ediləcəkdir.
Yanvarın 20-də rayondakı Bibiheybət ziyarətgahında və İçərişəhərdəki Cümə məscidində şəhidlərin xatirəsinə dualar oxunacaq və ehsan veriləcəkdir.
YAP rayon təşkilatının sədri Zahid Qaralov, Milli Məclisin deputatı Fuad Muradov 20 Yanvar faciəsinin həm də xalqımızın qəhrəmanlıq tarixi olduğunu vurğulamış, hadisənin beynəlxalq aləmdə təbliği ilə bağlı təkliflərini bildirmişlər.
Şəhid ailələri və əlillər adından çıxış edənlər göstərilən diqqət və qayğıya görə Prezident İlham Əliyevə minnətdarlıqlarını bildirmişlər.
Orta məktəb şagirdlərinin ifasında 20 Yanvara həsr olunmuş ədəbi-bədii kompozisiya nümayiş etdirilmişdir.
Tədbirin sonunda şəhid ailələrinə və əlillərə maddi yardım göstərilmiş, ərzaq bağlamaları paylanmışdır.
######
 |
 |
Bölmənin digər xəbərləri
