20 YANVAR FACİƏSİNİN DƏRSLƏRİ ŞAGİRDLƏRDƏ VƏTƏNPƏRVƏRLİK RUHU TƏRBİYƏ EDİR
Bakı şəhər Nizami Rayon Təhsil Şöbəsinin müdiri Mahal Əliyev AZƏRTAC-a bildirmişdir ki, 20 Yanvar faciəsinin 16-cı ildönümü günü rayonun təhsil işçiləri Şəhidlər xiyabanını ziyarət edərək, məzarlar üzərinə tər qərənfillər düzmüş, eləcə də Qara Qarayev prospektindəki parkda Vətən uğrunda şəhid olanların xatirə abidəsi önünə əklillər qoymuşlar. Bütün ümumtəhsil məktəblərində qanlı qırğına həsr olunmuş dərslər aparılmış, foto-rəsm sərgiləri, inşa yazı müsabiqələri, xatirə guşələri təşkil edilmiş, şagirdlərin ifasında ədəbi-bədii kompozisiyalar göstərilmiş, o müdhiş gecənin canlı şahidləri ilə görüşlər keçirilmişdir. Tədbirlərdə yanvar hadisələrinin mahiyyəti, xalqımızın azadlıq və müstəqillik uğrunda mübarizəsində yeri və rolu açıqlanmış, yalnız ümummilli liderimiz Heydər Əliyevin səyləri sayəsində 20 Yanvar faciəsinə hüquqi-siyasi qiymət verildiyi vurğulanmışdır.
Keçirilən tədbirlər şagirdlərin hərbi vətənpərvərlik tərbiyəsinin möhkəmlənməsinə, müstəqil dövlətçiliyimizə, onun qurucusu olan dahi rəhbərimiz Heydər Əliyev şəxsiyyətinə hörmət və məhəbbət hisslərinin yüksəldilməsinə öz töhfəsini vermişdir.
Bölmənin digər xəbərləri
