Ağdam, 20 yanvar, Tahir Ağaməmmədov, AZƏRTAC 

Azərbaycan xalqının qan yaddaşına əbədi həkk olunmuş 20 Yanvar faciəsinin 28-ci ildönümü Qarabağ bölgəsində böyük ehtiramla yad edilib.

AZƏRTAC-ın bölgə müxbiri xəbər verir ki, Tərtər rayonunda 20 Yanvar faciəsi qurbanlarının xatirəsinə həsr olunmuş tədbir Şəhidlər abidəsinin önündən başlanıb. Tərtərlilər və N saylı hərbi hissənin zabit və əsgərləri abidə-kompleksin önünə tər çiçəklər düzərək, şəhidlərin xatirəsini ehtiramla yad ediblər. Tədbir iştirakçıları məktəblilərin faciəyə həsr etdikləri əl işlərindən ibarət sərgiyə baxıblar.

Tədbir Gənclər Mərkəzində davam etdirilib. Rayon icra hakimiyyətinin başçısı Müstəqim Məmmədov çıxış edərək, 1990-cı il yanvarın 19-dan 20-nə keçən gecə sovet ordusu tərəfindən Bakıda həyata keçirilən qırğının səbəbləri və ağır nəticələri barədə ətraflı danışıb. Bildirib ki, keçmiş sovet dövlətinin hərb maşınının həmin gün Azərbaycan xalqına qarşı həyata keçirdiyi vəhşi terror aktı insanlığa qarşı törədilmiş ən ağır cinayətlərdən biri kimi bəşər tarixində qara səhifə olaraq qalacaq. Milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi.

Tanklar və BTR-lər Bakı küçələrində qarşılarına çıxan hər şeyi əzir, hərbçilər hər yanı amansız atəşə tuturdular. İnsanlar nəinki küçələrdə, hətta avtobusda gedərkən öz mənzillərində güllələrə tuş gəlirdilər. Yaralıları aparmağa gələn təcili yardım maşınları və tibb işçiləri də atəşə məruz qalırdı. Qanlı hadisələr zamanı 147 nəfər qətlə yetirilib, 744 nəfər yaralanıb, yüzlərlə adam itkin düşüb, 841 nəfər qanunsuz həbs edilmişdi.

Diqqətə çatdırılıb ki, belə bir ağır gündə xalqının səsinə hər kəsdən əvvəl səs verən də Heydər Əliyev oldu. Ümummilli Liderimiz Moskvada xüsusi nəzarət altında ola-ola, özünün və ailə üzvlərinin həyatını açıq təhlükə qarşısında qoyaraq, hadisələrdən dərhal sonra, 1990-cı il yanvarın 21-də Azərbaycanın Moskvadakı daimi nümayəndəliyinə getdi, təcavüzə kəskin etirazını bildirdi, faciəni törədənləri kəskin ittiham etdi, qoşunların Bakıdan çıxarılmasını tələb etdi. Heydər Əliyevin 1990-cı il 21 yanvar tarixli bəyanatı həm də faciəyə verilən ilk siyasi qiymət idi.

Tədbirdə 20 Yanvar hüzn günü münasibətilə keçirilən inşa yazı müsabiqəsinin qaliblərinə diplomlar təqdim edilib. Sonra iştirakçılar mədəniyyət evinin hazırladığı “Əsarətin son gecəsi” kompozisiyasına baxıblar.

Saat 12:00-da rayon ərazisində şəhidlərin xatirəsi bir dəqiqəlik sükutla yad edilib.

XXX

20 Yanvar faciəsi qurbanlarının xatirəsi Ağdam rayonunda da dərin hüznlə yad edilib. Rayon rəhbərliyi, ağsaqqallar, gənclər, ziyalılar, əmək kollektivlərinin nümayəndələri, müharibə veteranları, şəhid ailələrinin üzvləri, hərbçilər Şəhidlər abidə kompleksi önünə tər qərənfillər düzüblər. Azərbaycanın müstəqilliyi və ərazi bütövlüyü uğrunda şəhid olmuş Vətən övladlarının ruhuna dualar oxunub.

Ümumrayon mərasimində çıxış edənlər xalqımızın azadlıq mübarizəsindən, 20 Yanvar faciəsinin səbəblərindən və ağır nəticələrindən danışıblar. Bildirilib ki, 20 Yanvar xalqımızın tarixinin həm faciəli, həm də şərəfli səhifəsi, hər bir azərbaycanlı üçün qürur mənbəyidir. Çıxışlarda Qanlı Yanvar hadisələrinə siyasi-hüquqi qiymət verilməsində, faciənin günahkarlarının üzə çıxarılmasında, şəhidlərin adının əbədiləşdirilməsində ümummilli liderimiz Heydər Əliyevin əvəzsiz tarixi xidmətlərindən də bəhs edilib.

Tədbirdə Ağdam Dram Teatrının hazırladığı kompozisiya göstərilib.

Saat 12.00-da 20 Yanvar şəhidlərinin əziz xatirəsi bir dəqiqəlik sükutla yad olunub, avtomobillərdən səs siqnalları verilib.

XXX

Azərbaycan xalqının tarixinə qanlı səhifə kimi daxil olmuş 20 Yanvar faciəsinin 28-ci ildönümü Beyləqan rayonu ərazisində məskunlaşmış xocavəndli məcburi köçkünlər tərəfindən silsilə tədbirlərlə qeyd edilib.

Rayonun idarə, müəssisə və təşkilatlarında, ümumtəhsil müəssisələrində konfrans və yığıncaqlar təşkil edilib. Rayonun ümumtəhsil məktəblərində Qanlı Yanvar faciəsinə həsr edilmiş xüsusi dərslər, inşa, rəsm müsabiqələri, şahmat yarışı keçirilib. Faciəni əks etdirən guşələr və şagirdlərin əl işlərindən ibarət sərgilər təşkil edilib. Tədbirlərdə vətənpərvərlik şeirləri səsləndirilib, şagirdlərin ifasında ədəbi-bədii kompozisiya nümayiş etdirilib.

20 Yanvar faciəsinin 28-ci ildönümünə həsr olunmuş ümumrayon tədbiri isə Yeni Xocavənd qəsəbəsində şəhidlərin xatirəsinə ucaldılmış “Xatirə Abidə Kompleksi” önündə keçirilib. Rayon rəhbərliyi, ağsaqqallar, gənclər, ziyalılar, müharibə veteranları, əmək kollektivlərinin nümayəndələri, məktəblilər, N saylı hərbi hissənin əsgərləri həzin musiqi sədaları altında abidə kompleksini ziyarət edib, önünə əklil və al qərənfillər qoyublar. Şəhidlərin ruhuna dualar oxunub.

XXX

Yanvarın 20-də Bərdə şəhərindəki Qəhrəmanlar parkında keçirilən ümumrayon anma mərasimində minlərlə insan iştirak edib. Rayon ictimaiyyətinin nümayəndələri əbədi məşəl önünə tər qərənfillər qoyaraq, şəhidlərin ruhuna ehtiramlarını bildiriblər.

Tədbirdə çıxış edənlər 1990-cı il yanvarın 20-də törədilmiş faciədən, Vətənin azadlığı və ərazi bütövlüyü uğrunda canlarından keçən həmvətənlərimizin mübarizliyindən danışıblar. Bildirilib ki, 20 Yanvar Azərbaycan xalqının tarixində ümumxalq hüzn günü olmaqla yanaşı, azadlıq qələbəsinin təntənəsi günü kimi də əbədi həkk olunub.

Tədbirdə məktəblilərin hazırladığı ədəbi-bədii kompozisiya nümayiş olunub. Saat 12.00-da 20 Yanvar şəhidlərinin əziz xatirəsi bir dəqiqəlik sükutla yad olunub, avtomobillərdən səs siqnalları verilib.

XXX

20 Yanvar faciəsinin 28-ci ildönümü Ağcabədidə də silsilə tədbirlərlə qeyd edilib. Rayonun müəssisə və təşkilatlarında, yaşayış məntəqələrində müxtəlif tədbirlər keçirilib, sərgilər təşkil edilib.

Yanvarın 20-də Ağcabədi şəhərindəki Şəhidlər xiyabanında böyük izdiham yaşanıb. Xiyabana axışan ağcabədililər və ərazidə xidmət edən hərbi qulluqçular abidə kompleksi önünə və şəhid məzarları üzərinə tər qərənfillər düzüb, 20 Yanvar faciəsində həlak olan qəhrəman Vətən övladlarının xatirəsini böyük ehtiramla yad ediblər. Anım mərasimində Azərbaycanın dövlət himni səsləndirilib, şəhidlərin ruhuna dualar oxunub.

Tədbir ədəbi-bədii kompozisiya ilə davam edib.

XXX

20 Yanvar faciəsi qurbanlarının xatirəsi Ağcabədi rayonunun Taxtakörpü ərazisində məskunlaşmış laçınlı məcburi köçkünlər tərəfindən də yad edilib. Rayon ictimaiyyəti, ağsaqqallar, gənclər, ziyalılar, əmək kollektivlərinin nümayəndələri Taxtakörpü qəsəbəsində şəhidlərinin xatirəsinə ucaldılmış abidənin qarşısında şəhidlərin ölməz xatirəsinə ehtiramlarını bildirib, önünə gül-çiçək düzüblər. Sonra məktəblilərin hazırladığı ədəbi-bədii kompozisiya nümayiş olunub.

20 Yanvar faciəsinin ildönümü ilə əlaqədar qəsəbədə dövlət bayraqları endirilib, gün ərzində matəm musiqisi səsləndirilib.