20 Yanvar şəhidlərinin xatirəsi şimal-qərb bölgəsində böyük ehtiramla anılıb
Şəki-Zaqatala, 20 yanvar, Mustafa Dadaşov, AZƏRTAC
Azərbaycan xalqının qan yaddaşına əbədi həkk olunmuş 20 Yanvar hadisələrindən iyirmi səkkiz il ötür. Qanlı faciədən uzun illər keçməsinə baxmayaraq xalqımız o müdhiş gecəni daim xatırlayır, bu vəhşiliyi törədənlərə öz dərin nifrətini bildirir.
AZƏRTAC-ın bölgə müxbiri xəbər verir ki, müasir Azərbaycan tarixinin ən faciəli, eyni zamanda, xalqımızın azadlıq mübarizəsinin ən şanlı səhifələrindən olan 20 Yanvar faciəsinin ildönümü respublikamızın şimal-qərb bölgəsi rayonlarında da xalqımızın qəhrəmanlıq salnaməsi, milli qürur günü kimi qeyd olunub.
Faciənin ildönümü ilə əlaqədar yanvarın 20-də Şəki şəhərindəki “Şəhidlər xiyabanı”nda şəhər rəhbərliyinin, ictimaiyyət nümayəndələrinin, müharibə və əmək veteranlarının iştirakı ilə ümumşəhər toplantısı keçirilib. Tədbirdə çıxış edənlər Azərbaycan tarixinə Qanlı Yanvar kimi daxil olan bu faciənin xalqımızın qəhrəmanlıq salnaməsi, fəxarət və şərəf günü olduğunu vurğulayıblar. Bildirilib ki, həmin faciəli günlərdə öz xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucalıblar.
Çıxışlarda vurğulanıb ki, 1990-cı il yanvarın 19-dan 20-nə keçən gecə Azərbaycan xalqına qarşı törədilmiş bu cinayət, tökülmüş nahaq qanlar, insanların vəhşicəsinə qətlə yetirilməsi xalqımızın müstəqillik uğrunda mübarizə əzmini qıra bilməyib. Azərbaycan xalqına qarşı törədilən bu qanlı cinayət xalq kütlələrini birləşdirib, onların mübarizliyini daha da artırıb.
Həmin gün şəhərdəki Cümə Məscidində şəhidlərin ruhuna dualar oxunub. Saat 12.00-da rayonun bütün yaşayış məntəqələrində 20 Yanvar şəhidlərinin xatirəsi bir dəqiqəlik sükutla yad edilib.
20 Yanvar faciəsinin ildönümü ilə əlaqədar şəhər icra hakimiyyəti tərəfindən şəhid ailələrinə maddi yardım göstərilib.
X X X
20 Yanvar faciəsinin ildönümü ilə əlaqədar yanvarın 20-də Qax rayon ictimaiyyətinin, ayrı-ayrı əmək kollektivlərinin nümayəndələri, ağsaqqal və gənclər, sadə vətəndaşlar səhər saatlarından etibarən axın-axın Şəhidlər xiyabanına gələrək, 20 Yanvar şəhidlərinin xatirəsinə ucaldılmış abidənin önünə, həmçinin ərazi bütövlüyümüz uğrunda müharibədə şəhid olmuş igid həmyerlilərinin məzarları üzərinə gül-çiçək düzüb, şəhidlərin ölməz xatirəsini ehtiramla yad ediblər.
Toplantıda vurğulanıb ki, 1990-cı ilin 20 yanvarı Azərbaycanın istiqlaliyyət yolunun ilk şəhidlik zirvəsi idi. Xalqımız bu faciədə həyatdan getmiş övladlarını hüznlə anmaqla bərabər, onların şəhidlik zirvəsinə baxaraq, başını daim dik tutur. Çünki Vətən və torpaq şəhidləri ilə ucalır. 1990-cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilməyib. Həmin müdhiş gecədə şəhid olan Vətən oğulları Azərbaycanın tarixində şanlı səhifə yazıblar.
Tədbirdə şəhidlərin xatirəsinə həsr olunmuş ədəbi-bədii kompozisiya nümayiş etdirilib.
X X X
AZƏRTAC-ın bölgə müxbiri xəbər verir ki, 20 Yanvar faciəsinin 28-ci ildönümü Balakən rayonunda silsilə tədbirlə qeyd olunub.
Yanvarın 20-də rayon ictimaiyyətinin nümayəndələri “Şəhidlər xiyabanı”na gələrək ərazi bütövlüyümüz uğrunda döyüşlərdə şəhid olmuş igid həmyerlilərin məzarları üzərinə gül-çiçək düzüb, şəhidlərin xatirəsinə ehtiramlarını bildiriblər.
Rayon Mədəniyyət Mərkəzində keçirilən xatirə tədbirinin iştirakçıları əvvəlcə foyedə şəhidlərin xatirəsinə həsr olunmuş rəsm sərgisinə baxıblar.
Tədbirdə 20 Yanvarın Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi daxil olduğu vurğulanıb, bu hadisələrin xalqımızın qan yaddaşından heç vaxt silinməyəcəyi qeyd olunub.
Tədbirin sonunda 20 Yanvar şəhidlərinin xatirəsinə həsr olunan ədəbi-bədii kompozisiya nümayiş etdirilib.
X X X
Oğuz rayonunda 20 Yanvar faciəsinin iyirmi səkkizinci ildönümü ilə əlaqədar anım tədbirləri bir neçə gündür ki, davam edir. Faciənin ildönümü ilə bağlı tədbirlər planına uyğun olaraq hüzn günü ərəfəsində rayonun idarə, müəssisə və təşkilatlarında, ümumtəhsil məktəblərində, mədəniyyət ocaqları və kitabxanalarda konfranslar, “dəyirmi masa”lar, ədəbi-bədii gecələr keçirilib, sərgilər, guşələr təşkil edilib. Yanvarın 19-da rayonun bütün ümumtəhsil məktəblərində ilk dərslər Qanlı Yanvar mövzusuna həsr olunub.
Yanvarın 20-də rayon ictimaiyyətinin nümayəndələri səhər saatlarından başlayaraq Şəhidlər xiyabanına gələrək, Vətənimizin azadlığı və müstəqilliyi uğrunda şəhid olmuş igid həmyerlilərin məzarları üzərinə gül-çiçək düzüb, xatirəsini ehtiramla yad ediblər.
Bölmənin digər xəbərləri
