20 YANVAR ŞƏHİDLƏRİNİN XATİRƏSİ YAD OLUNMUŞDUR
ƏLİ BAYRAMLI. Qarabağ müharibəsi şəhidlərinin uyuduğu xiyabana gələnlərin ardı-arası kəsilmirdi. Torpaqlarımızın bütövlüyü uğrunda qanlı döyüşlərdə canından keçmiş vətən övladlarının məzarları üstünə gül-çiçəklər düzülmüş, onların ruhuna dualar oxunmuşdur.
20 Yanvar şəhidlərinin xatirə abidəsi önündə mitinq keçirilmişdir. Şəhər icra hakimiyyətinin başçısı Mərdan Camalov 16 il əvvəlki qanlı-qadalı dəhşətləri, sovet imperiyasının məkrli niyyətlərini, öz hakimiyyətini qoruyub saxlamaqdan ötrü bütün insani dəyərləri tapdalayan yerli xainlərin mənfur əməllərini yada salaraq, xalqın öz azadlığı naminə təpədən-dırnağadək silahlanmış ordu hissələri önündə canını sipər etməsini tarixi qəhrəmanlıq adlandırmışdır.
Məktəblilər ədəbi-bədii kompozisiya nümayiş etdirmiş, vətəni və qəhrəmanları vəsf edən şeirlər söyləmişlər.
X X X
İMİŞLİ. 20 Yanvar şəhidləri abidəsi önündə keçirilən mitinqi giriş sözü ilə rayon icra hakimiyyətinin başçısı Əbülfəz Ağayev açmışdır. Natiq qeyd etmişdir ki, 20 Yanvar sadəcə hüzn günü deyil, xalqın, millətin oyanış günü, özünüdərk günüdür. Qanlı hadisələr bir daha sübuta yetirdi ki, bu xalqın əzmi və iradəsini top-tüfənglə sarsıtmaq qeyri-mümkündür və bu xalq öz taleyi barədə müstəqil düşünmək yolunu qəti və birdəfəlik seçmişdir.
O, daha sonra qətliam günlərində qırmızı imperiyanın paytaxtı Moskvada çox böyük təqiblər şəraitində yaşayan ulu öndər Heydər Əliyevin Azərbaycan nümayəndəliyinə gələrək bəyanatla çıxış etməsini, Bakıda törədilmiş qırğınlar barədə bütün dünyaya məlumat çatdırmasını ən böyük hünər və rəşadət nümunəsi kimi qiymətləndirmişdir. Sonralar həmin hadisələrə əsil hüquqi və siyasi qiymət də məhz ümummilli liderimiz tərəfindən verilmişdir.
Qaragüvəndikli kənd orta məktəbinin direktoru Mirnazim Ağayev, qanlı hadisələrin iştirakçısı Qəribxanım İsmayılova və başqaları da şəhidlərin müqəddəs xatirəsinin əbədi yaşayacağını bildirmişlər.
Məktəblilərin hazırladığı ədəbi-bədii kompozisiya nümayiş etdirilmişdir.
Yerli icra hakimiyyəti tərəfindən 20 Yanvar hadisələrinin üç iştirakçısına maddi yardımlar çatdırılmışdır.
X X X
SABİRABAD. Rayonun bütün idarə, müəssisə və təşkilatlarında, təhsil ocaqlarında xalqımızın qəhrəmanlıq tarixinə şanlı səhifə kimi yazılmış 20 Yanvar faciəsinə həsr olunmuş tematik dərslər, ədəbi-bədii kompozisiyalar və digər xatirə tədbirləri təşkil edilmiş, Şəhidlər xiyabanı ziyarət edilmiş, şəhid ailələrinə maddi yardımlar göstərilmişdir.
Ümumrayon mitinqində çıxış edən icra hakimiyyətinin başçısı Heydər Abbasov xalqımızın qan yaddaşına əbədi yazılmış faciəni öz azadlığı və taleyi uğrunda çarpışan ölkəyə qarşı qəddarcasına həyata keçirilmiş hərbi təcavüz adlandıraraq, sinəsini yağıların tuşladığı qızılı güllələrə sipər eləyən vətən övladlarının əbədiyyətə qovuşduqlarını söyləmişdir.
Şəhid anası Gülbacı Həmidova, hərbi komissar Mahir Əmirov, Sosial-İqtisad Kollecinin tələbəsi Gülər Vəlixanova və başqaları da 20 Yanvar faciəsinin xalqımızın zəfər salnaməsi olduğunu bildirmiş, dövlətimizin başçısı, Ali baş komandan İlham Əliyevin rəhbərliyi ilə torpaqlarımızın işğaldan qurtularaq Azərbaycanın ərazi bütövlüyünün təmin olunacağına əminliklərini ifadə etmişlər.
X X X
SALYAN. Salyanlılar 20 Yanvar abidəsi önünə yığışaraq faciə qurbanlarının xatirəsini bir dəqiqəlik sükutla anmış, onların ruhuna dualar oxumuş, abidə önünə gül-çiçək dəstələri düzmüşlər.
Tədbiri giriş sözü ilə açan rayon icra hakimiyyətinin başçısı Rasim Bəşirov milli azadlıq mücadiləsi tariximizə öz qanları ilə parlaq səhifələr yazmış vətənin igid oğul və qızlarının ölməzlik qazandıqlarını, nəsillərə nümunə göstəriləcəklərini söyləmiş, Azərbaycanın dünya dövlətləri sırasında nüfuzunun ilbəil artdığını, müstəqilliyimizin əbədi olduğunu bildirən natiq, həm də sapı özümüzdən olan baltaların xəyanəti nəticəsində baş vermiş 20 Yanvar hadisələrinə yalnız ulu öndər Heydər Əliyevin qətiyyəti və prinsipiallığı sayəsində hüquqi və siyasi qiymət verildiyini xüsusi vurğulamışdır.
Mərasim iştirakçıları 20 Yanvar hadisələri zamanı şəhid olmuş həmyerliləri Elçin İmanovun məzarı üzərinə tər qərənfillər düzmüşlər.
Məktəblilər hazırladıqları ədəbi-bədii proqramı nümayiş etdirmiş, vətən və torpaq mövzusunda şeirlər söyləmişlər.
X X X
HACIQABUL. 20 Yanvar şəhidlərinin xatirəsinə ucaldılmış abidə önündə anma mərasimi keçirilmişdir.
Rayon icra hakimiyyətinin başçısı Firudin Babayev tədbiri açaraq torpaqlarımızın bütövlüyü uğrunda canından keçənlərin hamısına ulu tanrıdan rəhmət diləmiş, onların adlarının vətənin azadlıq uğrunda mübarizə tarixinə əbədi yazıldığını söyləmişdir.
Toplantı iştirakçıları Qarabağ müharibəsində həlak olmuş vətən övladlarının uyuduğu şəhidlər xiyabanını da ziyarət etmiş, Azərbaycanın dövlət müstəqilliyinin bərpası naminə canlarını qurban verən soydaşlarımızın xatirəsinə ehtiramlarını bildirmişlər.
Bölmənin digər xəbərləri
