20 YANVAR XALQIMIZIN HƏM QANLI, HƏM DƏ ŞƏRƏFLİ SƏHİFƏSİDİR
Bakı, 19 yanvar (AZƏRTAC). Azərbaycan Qaçqın və Məcburi Köçkün Gənclər Təşkilatı Yanvarın 19-da 149 nömrəli Ağdam rayon köçkün orta məktəbində 20 Yanvar faciəsinin 20-ci ildönümü ilə bağlı ədəbi-bədii tədbir keçirmişdir.
Məktəbin direktoru Arzu Mövsümova xalqımızın tarixində qanlı iz qoyan 20 Yanvar hadisələri haqqında ətraflı məlumat vermiş, bu faciənin yaranma səbəblərindən, onu törədən keçmiş imperiya rəhbərlərinin məkrli niyyətlərindən danışmışdır.
A.Mövsümova bildirmişdir ki, 1990-cı il yanvarın 20-nə keçən gecə Vətənin azadlığı uğrunda mübarizəyə qalxan, torpağına, sərhədlərinə edilən təcavüzə etirazını bildirən günahsız insanlar təpədən-dırnağadək müasir silahlarla silahlanmış sovet qoşunlarının amansız vəhşiliyinin qurbanı olmuşlar.
Çıxış edən müəllimlər 20 Yanvar faciəsinin tariximizin həm qanlı, həm də qəhrəmanlıq səhifəsi olduğunu vurğulamış, xalqımızın azadlığı və torpaqlarımızın bütövlüyü uğrunda mübarizədə həlak olanların ailələrinə Prezident İlham Əliyev tərəfindən daim qayğı göstərildiyini bildirmişlər.
Tədbirin sonunda ədəbi-bədii kompozisiya nümayiş etdirilmişdir.
Bölmənin digər xəbərləri
