20 Yanvar xalqımızın milli azadlıq hərəkatının yüksəliş zirvəsidir
Qax-Zaqatala, 19 yanvar, Mustafa Dadaşov, AZƏRTAC
Müasir Azərbaycan tarixinin ən faciəli, eyni zamanda, xalqımızın azadlıq mübarizəsinin ən şanlı səhifələrindən olan 20 Yanvar faciəsinin iyirmi səkkizinci ildönümü respublikamızın şimal-qərb bölgəsində də xalqımızın qəhrəmanlıq salnaməsi, milli qürur günü kimi qeyd olunur.
AZƏRTAC-ın bölgə müxbiri xəbər verir ki, faciənin ildönümü ilə əlaqədar yanvarın 19-da Qax şəhərində keçirilən anım tədbirində 20 Yanvar hadisələrinin bəşər tarixində insanlığa qarşı törədilmiş ən ağır cinayətlərdən biri olduğu vurğulanıb, faciənin acı nəticələri konkret faktlarla bir daha xatırlanıb.
Tədbir iştirakçıları əvvəlcə Yeni Azərbaycan Partiyası Qax rayon təşkilatının inzibati binasının foyesində məktəblilərin “Qanlı Yanvar” mövzusunda çəkdikləri rəsm əsərlərindən ibarət sərgi ilə tanış olublar.
Ziyalıların, ictimaiyyət nümayəndələrinin iştirak etdikləri tədbirdə rayon icra hakimiyyətinin başçısı Musa Şəkiliyev 20 Yanvar hadisələrinin cinayətkar mahiyyəti, onu doğuran səbəblər barədə danışıb. 1990-cı il yanvarın 20-də qaniçən sovet imperiyası ordusunun Bakı şəhərində xüsusi qəddarlıq və görünməmiş vəhşiliklə həyata keçirdiyi qətliamın xalqımıza qarşı törədilmiş ən dəhşətli cinayət olduğu diqqətə çatdırılıb.
Məruzə və çıxışlarda 20 Yanvarın Azərbaycanın azadlığı və ərazi bütövlüyü uğrunda mübarizə tarixinə həm də qəhrəmanlıq səhifəsi kimi daxil olduğu vurğulanıb. Bildirilib ki, həmin gün öz ölkəsinin, xalqının azadlığını, şərəf və ləyaqətini hər şeydən uca tutan mərd Vətən övladları canlarından keçərək şəhidlik zirvəsinə ucalıblar. 20 Yanvar hadisələri Azərbaycan xalqının iradəsini, milli azadlıq uğrunda mübarizə əzmini qıra bilməyib. Həmin müdhiş gecədə həlak olan Vətən oğulları Azərbaycanın tarixinə parlaq səhifə yazaraq xalqın milli azadlığı, müstəqilliyi üçün yol açıblar.
Çıxış edənlər 20 Yanvar gününün müasir tariximizdə xalqımızın azadlıq və qəhrəmanlıq salnaməsinin ən parlaq səhifələrindən biri kimi böyük əhəmiyyət daşıdığını, gələcək nəsillər üçün əsl qəhrəmanlıq örnəyi olduğunu bildiriblər. Faciə qurbanlarının qəhrəmanlığının heç vaxt unudulmayacağı, şəhidlərin əziz xatirəsinin daim uca tutulacağı vurğulanıb.
Tədbirin sonunda 20 Yanvar hadisələrindən bəhs edən sənədli film nümayiş etdirilib.
x x x
Böyük itkilər və günahsız insanların qətli ilə nəticələnən 20 Yanvar faciəsi cinayətkar imperiya rəhbərlərinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın mübarizliyini, əyilməzliyini bütün dünyaya bir daha nümayiş etdirib. Həmin qanlı hadisələrdən illər keçməsinə baxmayaraq, xalqımız o müdhiş gecəni daim xatırlayır, faciənin səbəbkarlarını lənətləyir.
Bu fikirlər 20 Yanvar faciəsinin 28-ci ildönümü ilə əlaqədar yanvarın 19-da Zaqatala şəhərindəki Heydər Əliyev Mərkəzində keçirilən anım tədbirində səsləndirilib.
Rayon rəhbərliyi və ictimaiyyətin nümayəndələri əvvəlcə şəhidlərin xatirəsinə ucaldılan abidənin önünə qırmızı qərənfillər düzüb, Vətənimizin azadlığı uğrunda şəhid olan qəhrəman oğul və qızlarımızın xatirəsini ehtiramla yad ediblər.
Sonra tədbir iştirakçıları Heydər Əliyev Mərkəzinin foyesində 20 Yanvar şəhidlərinin xatirəsinə həsr olunan rəsm və kitab sərgiləri ilə tanış olublar.
Tədbirdə çıxış edən rayon icra hakimiyyətinin başçısı Mübariz Əhmədzadə 20 Yanvarın xalqımızın milli azadlıq hərəkatının yüksəliş zirvəsi olduğunu bildirib. Vurğulanıb ki, bu qanlı hadisələrdən illər ötsə də, sovet ordusunun Azərbaycan xalqına qarşı törətdiyi planlı terror aktı bəşər tarixində insanlığa qarşı ən ağır cinayət olaraq qalacaq.
Çıxışlarda ümummilli lider Heydər Əliyevin Azərbaycanda hakimiyyətə qayıdışından sonra 20 Yanvar hadisələrinə hüquqi-siyasi qiymətin verildiyi, qanlı faciənin əsl günahkarlarının bütün dünyaya tanıdılması üçün zəruri işlərin görüldüyü diqqətə çatdırılıb. Vurğulanıb ki, Ulu Öndərin yolunu uğurla davam etdirən Prezident İlham Əliyev şəhidlərin xatirəsinin uca tutulmasına, onların ailələrinin sosial məsələlərinin yoluna qoyulmasına hər daim xüsusi diqqət göstərir.
Bölmənin digər xəbərləri
