QAN YADDAŞI
20 YANVAR XALQIMIZIN MÜSTƏQİLLİK ƏZMİNİN SARSILMAZ OLDUĞUNU BÜTÜN DÜNYAYA SÜBUT ETMİŞDİR
Bakı, 18 yanvar (AZƏRTAC). Yanvarın 18-də C.Cabbarlı adına Azərbaycan Dövlət Teatr Muzeyində 20 Yanvar faciəsinin iyirminci ildönümünə həsr olunmuş tədbir keçirilmişdir.
Tədbirdə şəhid ailələri, şagirdlər, tələbələr, 20 Yanvar Cəmiyyətinin nümayəndələri, Heydər Əliyev adına Azərbaycan Ali Hərbi Məktəbinin və C.Naxçıvanski adına Hərbi Liseyin müəllimləri və müdavimləri iştirak etmişlər.
Muzeyin şöbə müdiri Lalə Rəsulova xalqımızın azadlığı uğrunda meydanlara çıxan əliyalın insanların sovet qoşunlarına qarşı mətanətlə sinə gərərək, şəhidlik zirvəsinə ucalmalarını xalqımızın qəhrəmanlıq tarixinin şanlı səhifələrindən biri olduğunu bildirmişdir.
Çıxış edən AZƏRTAC-ın əməkdaşı Zərəngiz Mansurova, 20 Yanvar Cəmiyyəti sədrinin müavini Famil Şükürov və digərləri qeyd etmişlər ki, 20 Yanvar xalqımızın dəyanətinin və müstəqillik əzminin sarsılmaz olduğunu bütün dünyaya sübut etmişdir.
Tədbirdə 3 saylı Uşaq Musiqi Məktəbinin şagirdlərinin və Azərbaycan Dövlət Mədəniyyət və İncəsənət Universitetinin tələbələrinin ifasında ədəbi-bədii kompozisiyalar səslənmişdir.