REGİONLAR
Astara sakini: Mənə dahi şəxsiyyətlə görüşmək, Onun xeyir-duasını almaq nəsib olub VİDEO
Astara, 12 dekabr, İsmayıl Cəfərli, AZƏRTAC
Ulu Öndər Heydər Əliyevin vəfatından 20 il ötür. Görkəmli dövlət xadimi hakimiyyətdə olduğu dövrlərdə Azərbaycanın cənub bölgəsinə də dəfələrlə səfər edib, əməkçi insanlarla iş başında görüşüb, qayğı və problemlərinin həllinə həssaslıqla yanaşıb. Onlar bu dahi şəxsiyyəti daim böyük ehtiramla xatırlayırlar. Onlardan biri də Astara Rayon İcra Hakimiyyəti başçısı aparatının hüquq şöbəsinin müdiri Bəsti Əliyevadır.
O, AZƏRTAC-ın əməkdaşı ilə söhbətində deyib: “Nə yaxşı ki, əmək fəaliyyətim tarladan başlayıb. Çünki bu, mənə gənc yaşlarımda Ulu Öndərlə görüşmək şansı verib. Ulu Öndərimiz Astaraya tez-tez gələrdi. Zəhmətkeşlərlə səmimi görüşür, onların arzu-istəklərini dinləyir, problemləri ilə tanış olur və yerindəcə həll edirdi. Dövrümün ən şanslı gənclərindən olmuşam ki, bu dahi şəxsiyyətlə görüşmək, Onun xeyir-duasını almaq mənə nəsib olmuşdu”.
Ulu Öndərin Astaraya səfəri zamanı tarlada zəhmətkeşlərlə görüşündə Bəsti Əliyevanın 19 yaşı vardı. O, gənclər adından danışanda dahi rəhbər onun çıxışını bəyənir və təhsili ilə maraqlanır: “Mən hüquqşünas olacağamı dedim. İnamla dediyim söz onun çox xoşuna gəldi. Zarafatla, “Qızım hüquqşünas olmaqda məqsədin nədir? Prokuror olacaqsan, ya hakim?” - deyə soruşdu. “Hakim olacağam” - dedim. O isə “Qızım inanıram ki, hüquqşünas da olacaqsan, hakim də”, - dedi. Ulu Öndərin verdiyi bu xeyir-duadan sonra mən həmin il yüksək qiymətlərlə Hüquq fakültəsinə daxil oldum”.
Heydər Əliyev bölgələrdə savadlı, ixtisaslı kadrların yetişməsinə, onların yüksək vəzifələrə irəli çəkilməsinə diqqətlə yanaşırdı. İstəyirdi ki, bütün sahələrdə savadlı, bilikli, peşəkar kadrlar olsun. Masallının Şərəfə kənd orta məktəbinin tarix müəllimi, Azərbaycan SSR Ali Sovetinin deputatı olmuş Sərmayə Musayeva da Heydər Əliyevlə bağlı xatirələrini yada salır: “1980-ci ilin payız ayları idi. 20 yaşım vardı, Sabir adına sovxozda tərəvəz sahəsində işləyirdim. Ulu Öndərin səfəri zamanı Masallı stansiyasında ona gül-çiçək təqdim etmişdim. Düzdür, çox həyəcan keçirirdim. Məruzəm də geniş idi. Onun gözlərinə baxanda səmimiyyət, mehribançılıq duydum, diqqətlə mənə qulaq asırdı. Həmişə də gənclərə qayğı göstərirdi. Çıxışımdan sonra nə ilə məşğul olduğumu soruşdu və ali təhsil almağı məsləhət gördü”.
Ulu Öndərin tövsiyəsinə əməl edib ali məktəbə daha yaxşı hazırlaşan Sərmayə Musayeva 1983-cü ildə Bakı Dövlət Universitetinin Tarix fakültəsinə daxil olub və bu peşəyə qəlbən bağlanıb: “Həm ali təhsil almağımda, həm gələcək həyatımda Ulu Öndərin çox böyük rolu oldu. Bir çox mötəbər konfranslarda, tədbirlərdə Ulu Öndəri görürdüm. O, gənclərə xüsusi qayğı göstərirdi. Ona görə hamı onu ürəkdən sevirdi. Bu şəkillər də (şəkilləri göstərir - red.) həmin günlərdən xatirədir. Bizim Ulu Öndərimiz elə bir şəxsiyyət olub ki, onu heç kəslə müqayisə etmək olmaz. Fəxr edirəm ki, mən onunla görüşmüşəm, onun həyatı, gördüyü işlər barəsində gənc nəslə həvəslə danışıram”.