28 May - Müstəqillik Günü münasibətilə Budapeştdə rəsmi qəbul təşkil olunub
Budapeşt, 29 may, AZƏRTAC
Azərbaycanın Macarıstandakı səfirliyi 28 May - Müstəqillik Günü münasibətilə Budapeştdə rəsmi qəbul təşkil edib.
AZƏRTAC xəbər verir ki, tədbirdə Macarıstan dövlət qurumlarının, parlamentinin və ictimaiyyətinin, o cümlədən işgüzar və elmi-akademik dairələrin, media nümayəndələri, ölkədə akkreditə olunmuş diplomatik korpusun təmsilçiləri (50-dən çox diplomatik nümayəndəliyin rəhbərləri daxil olmaqla), eləcə də Macarıstanda yaşayan və təhsil alan həmvətənlərimiz iştirak ediblər.
Azərbaycan və Macarıstanın Dövlət himnlərinin səsləndirilməsi ilə başlayan tədbirdə çıxış edən səfir Tahir Tağızadə Azərbaycan Xalq Cümhuriyyətinin yaranması tarixindən, müstəqilliyinin bərpasından sonra ölkəmizin siyasi və sosial-iqtisadi sahələrdə əldə etdiyi uğurlardan, beynəlxalq miqyasda etibarlı tərəfdaşa çevrilməsindən, COP29 kimi mötəbər tədbirlərə yüksək səviyyədə ev sahibliyi etməsindən danışıb. Diplomat 2025-ci ilin Azərbaycanda “Konstitusiya və Suverenlik İli” elan olunduğunu xatırladaraq, Ümummilli Lider Heydər Əliyevin bilavasitə rəhbərliyi ilə hazırlanmış Azərbaycan Konstitusiyasının ölkəmizdə genişmiqyaslı islahatların əsasını təşkil etdiyini vurğulayıb. Vətən müharibəsində tarixi Qələbə və 2023-cü ilin sentyabrında həyata keçirilmiş uğurlu antiterror əməliyyatı nəticəsində 30 illik erməni işğalına son qoyulduğu, Azərbaycanın ərazi bütövlüyünün və suverenliyinin tam bərpa edildiyi, Prezident İlham Əliyevin Sərəncamına, əsasən 20 sentyabrın ölkəmizdə Dövlət Suverenliyi Günü elan olunduğu diqqətə çatdırılıb.
Azərbaycan-Macarıstan münasibətlərindən danışan T.Tağızadə genişləndirilmiş strateji tərəfdaşlıq əlaqələrinin dinamik və hərtərəfli xarakter daşıdığını, ikitərəfli əməkdaşlığın daha da gücləndirilməsi baxımından Azərbaycan Prezidentinin Macarıstana səfərinin əhəmiyyətini vurğulayıb. Azərbaycan-Macarıstan strateji dialoqunun, parlamentlərarası əlaqələrin, iqtisadi və humanitar sahələrdə əməkdaşlığın uğurlu inkişafından, o cümlədən nüfuzlu Eötvöş Lorand Universitetində (ELTE) Azərbaycan Dili və Mədəniyyəti Mərkəzinin açılmasından bəhs edilib. Türk Dövlətləri Təşkilatı (TDT) çərçivəsində səmərəli əməkdaşlıq qeyd olunub.
Tədbirdə fəxri qonaq qismində iştirak edən Macarıstan hökumətinin komissarı (portfelsiz nazir) Peter Hoppal çıxışında Azərbaycan xalqına və hökumətinə təbriklərini çatdırıb. O, iki dost ölkə arasında əlaqələrin son illərdə istər siyasi-iqtisadi, istərsə də mədəniyyət və elm sahələrində daha da gücləndiyini, genişləndirilmiş strateji tərəfdaşlıq səviyyəsinə yüksəldiyini bildirib. Prezident İlham Əliyev və Macarıstanın Baş naziri Viktor Orban arasında yaxın dostluq münasibətlərinin olduğu, liderlərin ölkələrimizi müttəfiqlər adlandırdıqları vurğulanıb. Tarixi oxşarlıqların, müstəqillik əzminin və ortaq mədəni irsin xalqlarımızı bir-birinə bağladığı bildirilib. Macarıstanın may ayında TDT-nin qeyri-rəsmi Zirvə görüşünə ev sahibliyi etməsinin Türk dövlətləri ilə əməkdaşlığa verilən önəmin təzahürü olduğu diqqətə çatdırılıb.
Tədbirin bədii hissəsində gitara ifaçısı Rəhman Məmmədli Azərbaycan musiqisindən nümunələr ifa edib.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
