Prezident təqaüdçüsü: Qalib xalqın qalib gənci kimi bu mükafatı almaq ayrıca bir qürur verir VİDEO
Bakı, 2 fevral, AZƏRTAC
Azərbaycan Prezidenti İlham Əliyev bu il fevralın 1-də “2024-cü il Gənclər üçün Prezident mükafatlarının verilməsi haqqında” Sərəncam imzalayıb. Sərəncama əsasən, elm, təhsil, mədəniyyət, gənclər siyasəti və gənclərlə iş, ictimai və sosialyönümlü fəaliyyət, innovasiya və sahibkarlıq sahələrində xüsusi fərqlənən 10 nəfər Gənclər üçün Prezident mükafatına layiq görülüb. Bu mükafatı alanlardan biri - Azərbaycan Tələbə Gənclər Təşkilatları İttifaqının (ATGTİ) sədri Pərviz Mirələmli təəssüratlarını AZƏRTAC-la bölüşüb.
Pərviz Mirələmli bu mükafata layiq görülməyin onu çox sevindirdiyini, qalib ölkənin gənci olaraq bu mükafatı almağın onun üçün xüsusi qürur olduğunu bildirib. Qeyd edib ki, mükafat dövlətimizin gənclər siyasətinin necə səmərəli olduğunun bariz nümunəsi, Ulu Öndər Heydər Əliyevin gənclər siyasətinin nəticəsidir. Hazırda Azərbaycanda digər sahələr kimi gənclər siyasətinin də dövlətimiz tərəfindən uğurla davam etdirildiyini vurğulayan gənc bu mükafatın təkcə ona yox, təmsil etdiyi ittifaqa da aid edildiyini söyləyib. Bu mükafatın 3 ildir sədri olaraq fəaliyyət göstərdiyi qurumun, onun əməkdaşlarının və bütün gənclərin fəaliyyətinin qiymətləndirilməsinin bariz nümunəsi olduğunu deyib.
ADA Universitetinin Dövlət və ictimai münasibətlər fakültəsində beş il ərzində müxtəlif istiqamətlər üzrə təhsil alan ATGTİ sədri deyib: “Düşünürəm ki, həmin illərdəki təhsil mənim gələcək karyeram üçün çox faydalı olub. Sonra karyeramı müxtəlif qurumlarda davam etdirmişəm. Əvvəlcə təcrübəçi kimi Avrasiya Əməkdaşlıq Fondunda fəaliyyətə başlamışam. Daha sonra bir müddət Beynəlxalq Almaniya Əməkdaşlıq Təşkilatında təcrübəçi, sonra isə layihə məsləhətçisi kimi işləmişəm. Əsasən inkişaf proqramları üzrə beynəlxalq sahədə təcrübəm var. ATGTİ-də müxtəlif vəzifələrdə - əlaqələndirici, menecer, baş katib, indi isə ittifaqın sədri kimi çalışıram. Hazırda Bakı Dövlət Universitetinin magistratura səviyyəsində ictimai siyasət ixtisası üzrə təhsil alıram, ictimai sahədə fəaliyyət göstərirəm.
Mükafat aldığım gün mənim üçün xüsusi gün oldu. Prezident mükafatına layiq görülən 10 gəncdən biri kimi seçildim. Belə bir ali mükafata layiq görülmək məni çox sevindirdi. Düşünürəm ki, rəhbəri olduğum təşkilatda qarşımızda hələ uzun yol var. Biz bu yolun hələ başlanğıcındayıq. Baxmayaraq ki, nəticələr, rəqəmlər həqiqətən böyükdür, amma görməli olduğumuz işlər də çoxdur”.
Bölmənin digər xəbərləri
