322 NÖMRƏLİ ORTA MƏKTƏBİN DİREKTORU MÜRVƏT MİRZƏYEVİN ÇIXIŞI
-Möhtərəm cənab Prezident!
Sizi yeni dərs ilinin başlaması və “Bilik günü” münasibətilə məktəbimizin pedaqoji kollektivi adından ürəkdən təbrik edir, son dərəcə çətin, lakin şərəfli fəaliyyətinizdə Sizə uğurlar arzulayırıq.
Bu gün biz ikiqat sevinc içərisindəyik. Birincisi ona görə ki, uzun müddətdən bəri minlərlə qəsəbə sakininin həsrətində olduğu yeni məktəbi bizə hədiyyə etmisiniz. İkincisi ona görə ki, yeni dərs ilinin ilk gününü və bilik bayramını bizimlə birlikdə keçirirsiniz. Bu sevinci bizə bəxş etdiyinizə görə məktəbimizin bütün kollektivi, şagirdləri və müəllimləri adından Sizə dərin minnətdarlığımızı bildiririk.
Cənab Prezident, danılmaz faktdır ki, ümummilli liderimiz Heydər Əliyev tərəfindən qoyulmuş etibarlı təməl əsasında və Sizin uğurlu daxili və xarici siyasətinizin nəticəsində ölkəmiz sürətlə inkişaf edir. Ölkə iqtisadiyyatının dinamik inkişafı təhsilin inkişafına da güclü təkan verir. Sizin müntəzəm diqqət və qayğınız nəticəsində təhsil sistemində davamlı inkişafa yönəlmiş əsaslı infrastruktur dəyişiklikləri baş verir, inkişafyönümlü proqram və layihələr həyata keçirilir. Nəticələr isə göz qabağındadır. Yeni məktəblər tikilir, mövcud məktəblər əsaslı təmir olunur, müasir avadanlıqla təchiz edilir, kompyuterləşdirilir, yeni dərsliklər hazırlanır və şagirdlərə pulsuz paylanılır. Təhsil işçilərinin əmək haqqı müntəzəm olaraq artırılır. Təhsilin məzmununda, idarə olunmasında, maliyyələşdirilməsində, imtahan sisteminin təşkilində aparılan islahatlar keyfiyyətin yüksəlməsinə səbəb olur. Elə bu qayğının nəticəsidir ki, bir müddət əvvəl imzaladığınız Sərəncamla “Ən yaxşı ümumtəhsil məktəbi” və “Ən yaxşı müəllim” mükafatlarının təsis edilməsi bilavasitə məktəbin və müəllimin statusunun yüksəldilməsinə yönəlmişdir. Bu yüksək diqqətə görə Sizə dərin minnətdarlığımızı bildiririk.
Ölkədə gedən sürətli inkişaf paytaxtımızdan da yan keçməmişdir. Təsdiq etdiyiniz proqrama əsasən, bu gün Bakı şəhəri qəsəbələrinin siması əsaslı şəkildə dəyişir, sosial infrastruktur yeniləşir.
Cənab Prezident, 2006-cı il dekabrın 30-da Albalılıq yaşayış massivində təməlini qoyduğunuz müasir tipli məktəb binası qısa müddət ərzində tikilib istifadəyə verilmişdir. 1296 yerlik 2,7 hektar əraziyə malik məktəb, müasir tipli istilik sistemi, müstəqil elektrik şəbəkəsi, su və yanğından mühafizə qurğuları, idman kompleksləri, yeməkxana, kitabxana, oxu zalı, informatika və fənn kabinetləri, laboratoriya və geniş sinif otaqlarından ibarətdir. Belə bir məktəbin tikilməsi bu yaşayış massivinin əhalisini həqiqətən çox sevindirmişdir. İndiyədək uyğunlaşdırılmış binada çətin şəraitdə oxuyan 1100 şagird hər cür şəraiti olan gözəl məktəbdə təhsilini davam etdirəcək, 70-dək müəllim onların təhsili ilə məşğul olacaqdır.
Möhtərəm Prezident, Sizin dediyiniz kimi, şagirdlərimiz yaxşı məktəbdə oxuyacaq və müəllimlərimiz yaxşı məktəbdə işləyəcəklər. Əminəm ki, bu cür möhtəşəm bir məktəbdə respublikamızın gələcəyi olan savadlı, bilikli, hərtərəfli inkişaf etmiş gənclər yetişdiriləcəkdir.
Möhtərəm cənab Prezident, Sizi pedaqoji kollektivimiz adından bir daha əmin edirik ki, təhsilimizin keyfiyyətinin yüksəldilməsi, gələcəyin layiqli vətəndaşlarının yetişdirilməsi sahəsində əlimizdən gələni əsirgəməyəcəyik.
Diqqətinizə görə minnətdaram.
Bölmənin digər xəbərləri
