İrlandiyada yaşayan azərbaycanlı: Fəxri konsulun təyin edilməsi qürurverici və mühüm addımdır VİDEO
Dublin, 14 dekabr, AZƏRTAC
Azərbaycanın İrlandiyada ilk fəxri konsulunun təyin edilməsi həm burada yaşayan azərbaycanlılar üçün, həm də Azərbaycan-İrlandiya münasibətləri baxımından çox mühüm və qürurverici bir hadisədir.
Bunu 12 ildir İrlandiyada yaşayan azərbaycanlı şirkət sahibi Fuad Əliyev AZƏRTAC-a açıqlamasında deyib.
O, İrlandiyanın paytaxtı Dublində Terri Leydenin Azərbaycanın fəxri konsulu təyin olunmasını tarixi hadisə kimi qiymətləndirərək bildirib ki, bu addım İrlandiyada yaşayan Azərbaycan icması üçün xüsusi əhəmiyyət daşıyır.
“İllərdir İrlandiyada Azərbaycanın bir nümayəndəliyinin olmasını arzulamışıq. Bu gün bu arzunun gerçəkləşdiyini görmək bizim üçün böyük bir qürurdur. Azərbaycan icması olaraq burada sıx əlaqələr qurmuşuq və öz cəmiyyətimizi formalaşdırmışıq. İndi isə burada fəxri konsulun təyin olunması bizim üçün xüsusi əhəmiyyət kəsb edir”, - deyə Fuad Əliyev vurğulayıb.
O, həmçinin İrlandiyada çoxsaylı azərbaycanlıların yaşadığını və burada Azərbaycanın təmsil olunmasının əlaqələri daha da gücləndirəcəyini qeyd edərək deyib: “Burada 20 ildən artıq yaşayan azərbaycanlılar var. Mən buraya 2012-ci ildə təhsil məqsədilə gəlmişəm və 2015-ci ildə İrlandiyada öz şirkətimi təsis etmişəm. İrlandiya Hökumətinin “High Potential Startup Scheme” proqramı çərçivəsində dəstək alaraq fəaliyyətimi genişləndirmişəm. İllərdir Azərbaycanı bu ölkədə ən yaxşı şəkildə təmsil etməyə çalışmışıq və düşünürəm ki, indi fəxri konsulun dəstəyi ilə bu səylər daha geniş miqyas alacaq”.
Azərbaycanın İrlandiyada fəxri konsulunun təyin edilməsinin iki ölkə arasında əlaqələrin inkişafına mühüm töhfə verəcəyini bildirən F.Əliyev əlavə edib: “Azərbaycan və İrlandiya arasında mədəni, iqtisadi və biznes sahələrində əlaqələrin daha da genişləndirilməsinə böyük ehtiyac var. Fəxri konsulun təyin edilməsi bu istiqamətdə çox mühüm addımdır. İnanıram ki, bu addım iki ölkə arasındakı münasibətləri yeni bir səviyyəyə qaldıracaq”.
Qeyd edək ki, Azərbaycan Respublikasının iqamətgahı Londonda yerləşən İrlandiyadakı səfirliyi Azərbaycanın Dublində fəaliyyətə başlayan fəxri konsulunun təqdimatı münasibətilə paytaxt Dublində təntənəli qəbul keçirib.
Aytən Abbaslı
AZƏRTAC-ın xüsusi müxbiri
Dublin
Bölmənin digər xəbərləri
