İQTİSADİYYAT
İNVESTİSİYA MÜSABİQƏSİNİN QALİBİ “FEMİDA”MMC-DİR
AZƏRTAC xəbər verir ki, Dövlət Əmlakının İdarə Edilməsi üzrə Dövlət Komitəsi “Məişət Maye Qaz” Açıq Səhmdar Cəmiyyətinin səhmlərinin satışı üzrə investisiya müsabiqəsi keçirmişdir.
Müsabiqədə iddiaçılar qarşısında yeni iş yerlərinin açılması və işçilərin sosial təminatının yüksəldilməsi məsələlərinin həllini özündə əks etdirən təkliflərin verilməsinə dair şərtlər qoyulmuşdur.
Açıq səsvermə yolu ilə “Femida” MMC müsabiqənin qalibi olmuşdur. Bu müəssisənin təqdim etdiyi İnvestisiya Proqramına əsasən, iki il ərzində “Məişət Maye Qaz” ASC üç milyon manat məbləğində sərmayənin qoyuluşuna dair öhdəliyi yerinə yetirməlidir. İnvestisiyalar regionlarda yerləşən maye qazdoldurma stansiyalarının müasir tələblərə uyğun qurulmasına, bölgələrdə irihəcmli maye qaz tutumlarının quraşdırılmasına yönəldiləcəkdir.
Müsabiqənin şərtlərinə əsasən, “Femida” MMC iki milyon manat məbləğində vəsaiti dövlət büdcəsinə köçürməli, 40 min ədəd dövlət özəlləşdirmə çekini təqdim etməlidir.