40 MİNDƏN ÇOX SÜRÜCÜ BARƏSİNDƏ İNZİBATİ TƏNBEH TƏDBİRLƏRİ GÖRÜLMÜŞDÜR
Aylıq ərzində yol hərəkəti qaydalarını pozan 40 min 407 sürücü aşkar edilərək, barələrində müvafiq inzibati tənbeh tədbirləri görülmüşdür. O cümlədən, sürət həddinin aşılması ilə bağlı 10571, dayanma-durma ilə əlaqədar 5066, qəza şəraitinin yaradılması ilə bağlı 723 fakt qeydə alınmışdır.
Aylığın gedişi mətbuat, radio və televiziya vasitəsilə, mütəmadi olaraq, ictimaiyətin nəzərinə çatdırılmasına və kobud qayda pozucularının bilavasitə ifşa olunmasına baxmayaraq, nəticə etibarilə, yol-nəqliyyat hadisələrinin qarşısının alınması istiqamətində tam müsbət nəticələr əldə edilməmişdir. Belə ki, aylıq ərzində 22 nəfərin ölümü, 110 adamın yaralanması ilə nəticələnən 113 yol-nəqliyyat hadisəsi baş vermişdir ki, bu da ötən ilin eyni dövrü ilə müqayisədə 2 ölüm, 24 yaralı və 43 hadisə çoxdur. Lakin yol-nəqliyyat hadisələrinin təhlili göstərir ki, qəzaların artım sürəti azalmış və ağırlıq dərəcəsi aşağı düşmüşdür. Bundan əlavə, hərəkət iştirakçıları arasında nizam-intizamın yüksəlməsi nəzərə çarpmaqdadır. Qeyd olunmalıdır ki, yol-nəqliyyat qəzalarının əksəriyyəti günün qaranlıq vaxtlarına təsadüf edir.
