WUF13 və bayram günləri ərəfəsində cənub bölgəsinə turist axını gözlənilir VİDEO
Lənkəran, 15 may, AZƏRTAC
Azərbaycanın ev sahibliyi edəcəyi BMT-nin Ümumdünya Şəhərsalma Forumunun 13-cü Sessiyası (WUF13) ölkəmizin paytaxtı ilə yanaşı, regionların da beynəlxalq turizm xəritəsindəki mövqeyini möhkəmləndirəcək. Azərbaycanın füsunkar bölgələri, xüsusilə də zəngin təbiəti və qədim mədəniyyəti ilə seçilən cənub regionu bu mötəbər tədbir çərçivəsində ölkəmizə gələcək çoxsaylı xarici qonaqları qarşılamağa hazırdır. Yeni turizm mövsümü ərəfəsində ölkəmizin cənub bölgəsində hazırlıq işləri artıq yekunlaşmaq üzrədir.
Regionun turizm potensialına artan maraq yeni istirahət məkanlarının, xüsusilə də son illərin trendi olan aqroturizm obyektlərinin fəaliyyətə başlamasını əhəmiyyətli dərəcədə sürətləndirib. Cari mövsümdən etibarən qlobal forumun nümayəndələri və turistlər cənubun füsunkar təbiətində dincəlməklə yanaşı, həm də kənd həyatının koloriti ilə yaxından tanış olmaq, yerli adət-ənənələri və təbii mühiti yaxından müşahidə etmək imkanı qazanacaqlar.
AZƏRTAC-ın bölgə müxbiri xəbər verir ki, aqroturizm sahəsindəki canlanma bölgədə yeni infrastruktur layihələrinin icrasını da stimullaşdırır. Qonaqların səyahət marşrutlarını asanlıqla müəyyənləşdirməsi və bölgənin turizm imkanlarından maksimum yararlanması məqsədilə Lənkəran şəhərində müasir standartlara cavab verən turist məlumat köşkü fəaliyyət göstərir. Burada müraciət edən hər bir turistə bölgənin tarixi-mədəni abidələri, kənd turizm evləri, yerləşmə imkanları və ən cəlbedici istirahət nöqtələri barədə operativ və ətraflı məlumatlar təqdim olunur.
Lənkəran Regional Turizm İdarəsinin rəisi İlqar Əzimov bildirib ki, bu mövsümdə bölgədə yeni aqroturizm obyektlərinin fəaliyyətə başlaması nəzərdə tutulur. Onun sözlərinə görə, fəaliyyət göstərən aqroturizm məkanlarında da turistlər üçün yeni xidmət və əyləncə növləri təqdim olunacaq.
Onun sözlərinə görə, xüsusilə kənd turizmi istiqamətində mühüm işlər görülüb və kənd turizm evlərinin sayı nəzərəçarpacaq dərəcədə artıb. Bu isə insanların kənd və aqroturizmə marağının yüksəldiyini göstərir.
Hazırda bölgədə fəaliyyət göstərən turizm obyektlərində monitorinqlər aparılır. Məqsəd turistlərə təqdim olunan xidmətlərin keyfiyyətini beynəlxalq standartlara uyğunlaşdırmaqdır. Obyekt sahiblərinə xidmət səviyyəsinin artırılması, turist məmnuniyyətinin təmin edilməsi və təhlükəsizlik qaydaları ilə bağlı müvafiq tövsiyələr verilib.
“Turistlərin bölgəyə səfərini daha rahat təşkil etmək məqsədilə Lənkəran şəhərində xüsusi məlumatlandırma mərkəzləri də yaradılıb. Burada turistlər cənub bölgəsinin turizm marşrutuna daxil olan məkanlarla əvvəlcə virtual şəkildə tanış olurlar. Sonra isə seçdikləri istiqamət üzrə asan şəkildə yönləndirilirlər” , - deyə İlqar Əzimov bildirib.
Ekspertlər də bildirirlər ki, yaxın günlərdə ölkəmizdə keçiriləcək WUF13 və ayın sonuna təsadüf edən bayram günləri ilə əlaqədar turist axınının artacağı proqnozlaşdırılır. Turizm obyektləri sahiblərinin sözlərinə görə, cənub bölgəsində ciddi qiymət artımı müşahidə edilmir.
Otel meneceri Rəşid Ziyadzadə ilə söhbət zamanı bildirib ki, xüsusilə WUF13 tədbiri və qarşıdan gələn bayram günləri ilə əlaqədar rezervasiyalarda artım müşahidə olunur. “Hazırda hoteldə “single” otaqların qiyməti 90, “double” otaqların qiyməti isə 120 manat təşkil edir. Qiymətlərə səhər yeməyi və hovuz xidmətindən istifadə də daxildir”, - deyə o əlavə edib.
Son illərdə turistlər yalnız hotellərdə deyil, kənd evlərində qalmağa və yerli həyat tərzini yaxından tanımağa da maraq göstərirlər. Bu tendensiya həm bölgə iqtisadiyyatına əlavə töhfə verir, həm də kənd yerlərində yeni məşğulluq imkanlarının yaranmasına şərait yaradır.
Beləliklə, WUF13 qonaqlarının və yerli turistlərin regionlara artan marağı təkcə xidmət sektorunun keyfiyyətcə yeni mərhələyə keçməsinə deyil, həm də milli-mədəni irsimizin, kulinariya ənənələrimizin və qonaqpərvərlik dəyərlərimizin qlobal miqyasda təbliğinə geniş imkanlar açır.
Müxbir - İlkin Adıyev
Bölmənin digər xəbərləri
