Qusar, 16 iyul, AZƏRTAC

Dini Qurumlarla İş üzrə Dövlət Komitəsinin təşkilatçılığı ilə 22 İyul – Milli Mətbuat Günü münasibətilə Qusar şəhərində "Dini mövzuların mediada təqdimatı: dini sabitliyin qorunmasında birgə məsuliyyət" mövzusunda konfrans keçirilib.

AZƏRTAC-ın bölgə müxbiri xəbər verir ki, konfransda ölkənin aparıcı televiziya kanalları, informasiya agentlikləri, qəzet və xəbər saytlarını əhatə edən 30-dan çox media qurumunun 50-yə yaxın təmsilçisi, dövlət orqanları, vətəndaş cəmiyyəti institutlarının nümayəndələri, din xadimləri və blogerlər iştirak ediblər.

Tədbirdən əvvəl konfrans iştirakçıları Qusar şəhərində Ulu Öndər Heydər Əliyevin abidəsini ziyarət edib, önünə gül dəstələri düzüblər.

Konfrans Azərbaycan Respublikasının Dövlət Himninin səsləndirilməsi ilə başlayıb. Daha sonra ölkəmizdəki tolerantlıq mühiti, Mənəvi Dəyərlərin Təbliği Fondunun həyata keçirdiyi "Hər məsciddə kitabxana" layihəsi, Dövlət Komitəsinin "AMİN" İnformasiya Sistemi barədə videoçarxlar nümayiş olunub.

Qusar Rayon İcra Hakimiyyətinin başçısı Sahir Məmmədxanov çıxışında konfransın dini mövzuların mediada peşəkar və məsuliyyətli şəkildə işıqlandırılması baxımından əhəmiyyətindən danışıb. Bildirib ki, müasir dövrdə informasiya mühitində baş verən sürətli dəyişikliklər media nümayəndələrinin üzərinə daha böyük məsuliyyət qoyur. Bu baxımdan dövlət orqanları ilə media arasında səmərəli əməkdaşlığın və peşəkar dialoqun davam etdirilməsi mühüm əhəmiyyət kəsb edir. Sahir Məmmədxanov konfransın Milli Mətbuat Günü ərəfəsində keçirilməsinin rəmzi məna daşıdığını önə çəkərək, media nümayəndələrini peşə bayramı münasibətilə təbrik edib və onlara fəaliyyətlərində uğurlar arzulayıb.

Dini Qurumlarla İş üzrə Dövlət Komitəsinin sədri Ramin Məmmədov Şuşada keçirilən “Sülhün təşviqində medianın missiyası: Həqiqətin bərpası və etimadın yenidən qurulması” mövzusunda IV Şuşa Qlobal Media Forumunda Prezident İlham Əliyevin beynəlxalq media nümayəndələri ilə açıq dialoqunun Azərbaycanın şəffaflıq, obyektiv informasiya mübadiləsi və qlobal əməkdaşlıq prinsiplərinə sadiqliyinin bariz ifadəsi olduğunu bildirib. O qeyd edib ki, dövlət başçısının beynəlxalq gündəmdə mühüm yer tutan siyasi, iqtisadi və təhlükəsizlik məsələlərinə dair səsləndirdiyi fikirlər həm regionda, həm də dünyada baş verən proseslərin düzgün qiymətləndirilməsi, dezinformasiyaya qarşı mübarizə və davamlı sülhün təşviqi baxımından mühüm əhəmiyyət daşıyır.

Ramin Məmmədov bildirib ki, bugünkü konfrans çərçivəsində nümayiş olunan təqdimatlar Prezident İlham Əliyevin rəhbərliyi ilə həyata keçirilən dövlət-din siyasətinin müasir çağırışlara uyğun inkişafını əks etdirir. “Azərbaycan tolerantlığı” sənədli filmi, Dövlət Komitəsinin həyata keçirdiyi rəqəmsallaşma siyasətinin tərkib hissəsi olan “AMİN” İnformasiya Sistemi və ictimaiyyətin maraqla izlədiyi “Hər məsciddə kitabxana” layihəsi vahid strateji baxışın əyani məhsuludur. Komitə sədri vurğulayıb ki, “Azərbaycan tolerantlığı” sənədli filmi ölkəmizdə formalaşmış dövlət-din münasibətləri modelini, dini müxtəlifliyin cəmiyyətdə qarşılıqlı etimadın, milli birliyin və ictimai sabitliyin mühüm amillərindən biri olduğunu göstərir. O bildirib ki, Azərbaycanda dini-mədəni irsin qorunması, ibadət yerlərinin bərpası və konfessiyalararası əməkdaşlığın inkişafı istiqamətində həyata keçirilən ardıcıl tədbirlər tolerantlıq ənənələrinin daha da möhkəmlənməsinə xidmət edir. Eyni zamanda bu dəyərlərin təkcə Azərbaycanda deyil, ölkə hüdudlarının kənarda da təqdimatı çox vacibdir. Bu sahədə Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondunun fəaliyyəti xüsusi əhəmiyyət kəsb edir.

R.Məmmədov bildirib ki, “AMİN” İnformasiya Sistemi dini sahədə elektron xidmətlərin və informasiya resurslarının vahid platformada birləşdirilməsini təmin etməklə idarəetmədə şəffaflığın, operativliyin, səmərəliliyin artırılmasına, media və ictimaiyyət üçün etibarlı məlumat mənbəyinin formalaşdırılmasına imkan yaradacaq. Sistem rəqəmsal məkanda yanlış məlumatların yayılmasının qarşısının alınmasına da töhfə verəcək.

“Hər məsciddə kitabxana” layihəsinə də toxunan komitə sədri bildirib ki, təşəbbüs məscidlərin maarif və elm ocağı kimi tarixi ənənələrinin yaşadılmasına, mütaliə mədəniyyətinin inkişafına və sağlam dini maarifçiliyin təşviqinə xidmət edir.

Azərbaycan Dövlət İnformasiya Agentliyinin (AZƏRTAC) İdarə Heyəti sədrinin müavini Dağbəyi İsmayılov söyləyib ki, müasir informasiya məkanında media təkcə xəbər çatdıran vasitə deyil, həm də ictimai rəyin və mənəvi dəyərlərin formalaşmasına təsir göstərən mühüm sosial institutdur. O, dini mövzuların peşəkar, dəqiq və məsuliyyətli şəkildə işıqlandırılmasının cəmiyyətdə dini sabitliyin, qarşılıqlı hörmətin və tolerantlığın möhkəmlənməsində mühüm rol oynadığını ifadə edib. Dini sabitliyin qorunması yalnız dövlət təşkilatlarının deyil, eyni zamanda media, dini icmalar, təhsil müəssisələri və vətəndaş cəmiyyətinin birgə məsuliyyətidir. Dağbəyi İsmayılov yoxlanılmamış və manipulyativ məlumatların cəmiyyətdə gərginlik yarada biləcəyini diqqətə çatdıraraq, media mənsublarını bu sahədə peşəkar, obyektiv və etik prinsiplərə sadiq olmağa çağırıb.

Baku TV-nin direktoru Ramin Cəfərov bildirib ki, Azərbaycanda din-media münasibətləri sağlam təməl üzərində formalaşıb və ölkə dünyada dini tolerantlıq, multikulturalizm ənənələri ilə seçilir. Onun sözlərinə görə, mətbuat milli-mənəvi dəyərlərin və mövcud tolerantlıq mühitinin cəmiyyətə, eləcə də beynəlxalq ictimaiyyətə düzgün çatdırılmasında mühüm rol oynayır. Ramin Cəfərov diqqətə çatdırıb ki, Baku TV fəaliyyətində peşəkarlıq, obyektivlik və milli maraqlar prinsiplərini rəhbər tutur, dini mövzuları manipulyasiyalardan uzaq şəkildə işıqlandırır. O, həmçinin media subyektləri ilə Dini Qurumlarla İş üzrə Dövlət Komitəsi arasında əməkdaşlığın önəm daşıdığını deyib.

APA TV-nin baş direktoru Orxan Məmmədli rəhbərlik etdiyi media qurumu ilə Dövlət Komitəsi arasında həyata keçirilən əməkdaşlıq çərçivəsində hazırlanan "İMAN" layihəsinin cəmiyyətdə milli-mənəvi dəyərlərin, ailə institutunun və tolerantlıq ənənələrinin təbliğinə xidmət etdiyini bildirib. Dini sabitliyin qorunmasında dövlət strukturları və din xadimləri ilə yanaşı, medianın da mühüm rolu olduğunu, mövzuların işıqlandırılmasının yüksək məsuliyyət və etimad tələb etdiyini diqqətə çatdıran natiq bu sahədə faktlara söykənən, maarifləndirici və peşəkar jurnalistikanın cəmiyyət üçün xüsusi əhəmiyyət daşıdığını deyib. Orxan Məmmədli əlavə edib ki, media cəmiyyətin milli-mənəvi dəyərlərinin qorunmasında, sağlam düşüncənin formalaşmasında və dini maarifləndirmədə fəallıq göstərməlidir.

Teleqraf Media Qrupun rəhbəri Aynur Camalqızı rəqəmsal informasiya mühitində dini mövzuların manipulyasiya edilməsinin yaratdığı təhlükələrdən danışıb. O bildirib ki, müasir dövrdə informasiya təkcə xəbər mənbəyi deyil, eyni zamanda siyasi, psixoloji təsir və milli təhlükəsizlik amilidir. Dezinformasiya kampaniyaları getdikcə daha çox insanın dini inanclarını, milli kimliyini və mənəvi dəyərlərini hədəfə alır. Sosial şəbəkələrin dini diskursun əsas platformalarından birinə çevrildiyi, alqoritmlərin isə həqiqəti deyil, daha çox diqqət çəkən məzmunu önə çəkdiyi və müqəddəs mətnlərin kontekstdən çıxarılması kimi halların ən geniş yayılmış tendensiyalardan olduğu qeyd edilib.

“ARB 24” telekanalının icraçı direktoru Radik İsmayılov dini mövzuların mediada işıqlandırılmasının cəmiyyətin sabitliyi baxımından xüsusi məsuliyyət tələb etdiyini bildirib. O qeyd edib ki, informasiya mühitində yayılan hər bir xəbər ictimai rəyə təsir göstərir. Buna görə də dini mövzuların işıqlandırılmasında faktlara söykənmək, balansı qorumaq, stereotiplərdən və nifrət dilindən uzaq olmaq peşə etikası ilə yanaşı, ictimai məsuliyyət məsələsidir.

Radik İsmayılov dezinformasiya və süni intellekt vasitəsilə yayılan saxta məzmunun yaratdığı risklərə diqqət çəkərək, sağlam informasiya mühitinin dini sabitliyin qorunmasında mühüm rol oynadığını vurğulayıb. O, həmçinin din xadimlərinin media ilə açıq əməkdaşlıq etməsinin, jurnalistlərin suallarını elmi və etibarlı mənbələrə əsaslanaraq cavablandırmasının, eləcə də dini mövzular üzrə ekspert bazasının formalaşdırılmasının vacibliyini diqqətə çatdırıb.

Konfrans rəqəmsal informasiya mühitində dini mövzuların işıqlandırılması, informasiya manipulyasiyası və dezinformasiya ilə mübarizə, dini savadlılığın təşviqi, eləcə də medianın milli-mənəvi dəyərlərin qorunmasındakı rolu ilə bağlı panel müzakirələri ilə davam edib.

_{Müxbir – Elxan Yusifli}