Futbol üzrə Almaniya millisi dördüncü dəfə dünya çempionu adını qazanmışdır VİDEO
Bakı, 14 iyul (AZƏRTAC). İyulun 13-də Braziliyada keçirilən futbol üzrə XX dünya çempionatı başa çatmışdır.
AZƏRTAC xəbər verir ki, final oyunundan əvvəl Rio-de-Janeyro şəhərindəki “Marakano” stadionunda turnirin təntənəli bağlanış mərasimi keçirilmişdir. Sonra qızıl medal uğrunda mübarizə aparan Almaniya və Argentina milli komandaları meydançaya çıxmışlar.
1950-ci ildə istifadəyə verilmiş 74 min 738 yerlik stadionda keçirilən final oyununu italiyalı baş hakim Nikola Rizzolini idarə etmişdir. Oyunun əsas vaxtında hesab açılmamışdır. Qalib matça əlavə olunmuş 30 dəqiqədə müəyyənləşmişdir. Görüşün 113-cü dəqiqəsində almaniyalı futbolçu Mario Götzenin vurduğu qol sayəsində Almaniya millisi dördüncü dəfə dünya çempionu adını qazanmışdır. Avropa təmsilçisi bundan əvvəl daha üç dəfə - 1954, 1974 və 1990-cı illərdə dünya çempionu olmuşdu. Argentina isə 1978 və 1986-cı illərdə mundialın qızıl medallarına yiyələnmişdi.
Oyun başa çatdıqdan sonra mükafatlandırma mərasimi keçirilmişdir. Turnirin ən yaxşı qapıçısı almaniyalı Manuel Neuer, ən yaxşı hücumçusu argentinalı Lionel Messi seçilmişlər.
Sonda Braziliyanın prezidenti Dilma Ruseff və FİFA-nın prezidenti Jozef Blatter dünya kubokunu Almaniya millisinin kapitanı Filipp Lama təqdim etmişlər.
Mundial möhtəşəm atəşfəşanlıqla yekunlaşmışdır.
Bu oyunadək Almaniya və Argentina milliləri öz aralarında 20 dəfə görüşmüşdülər. Bu oyunlardan 9-da Argentina, 6-da Almaniya qalib gəlmiş, 5 oyun isə bərabər başa çatmışdır. Argentina və Almaniya dünya çempionatının finalında iki dəfə üz-üzə gəlmişlər. 1986-cı ildə keçirilən finalda Argentina komandası 3:2 hesabı ilə qələbə qazanmışdı. 1990-cı ildə Almaniya bu məğlubiyyətin əvəzini çıxa bilmişdi. O zaman almaniyalı futbolçular 1:0 hesabı ilə qələbə qazanaraq dünya çempionu olmuşdular.
Qeyd edək ki, növbəti dünya çempionatı 2018-ci ildə Rusiyada keçiriləcəkdir.
Bölmənin digər xəbərləri
