Şimal bölgəsinin şagirdləri Xaçmaz şəhərində təşkil edilən 4 imtahan mərkəzində biliklərini sınayıb VİDEO
Xaçmaz, 2 iyul, Elxan Yusifli, AZƏRTAC
İyulun 2-də Tələbə Qəbulu üzrə Dövlət Komissiyası (TQDK) tərəfindən keçirilən qəbul və buraxılış imtahanlarında şimal bölgəsindən olan şagirdlər biliklərini Xaçmaz şəhərində təşkil edilən dörd imtahan mərkəzində yoxlayıb.
AZƏRTAC xəbər verir ki, imtahanlarda Quba, Qusar, Şabran, Xaçmaz, Xızı və Siyəzən rayonlarından olan 2 min 88 şagird iştirak edib. İmtahanlara nəzarət üçün 204 müəllim cəlb edilib. İmtahan bütün binalarda eyni vaxtda - saat 10:00-da başlayıb.
Xaçmazla yanaşı, respublikanın digər 13 şəhər və rayonunda yaradılmış imtahan mərkəzlərində də ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara) qəbul imtahanı keçirilib. Qəbul imtahanları, eyni zamanda, tam (11 illik) orta təhsil bazasında orta ixtisas təhsili müəssisələrinə (kolleclərə) sənəd verən əvvəlki illərin məzunları və ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları üçün də təşkil edilib.
Bununla yanaşı, ümumi (9 illik) və tam (11 illik) orta təhsil səviyyələrini əvvəlki dərs illərində başa vuran, lakin müxtəlif səbəblərə görə yekun attestasiyası aparılmayan, eləcə də eksternat qaydasında attestasiyada iştirak etmək üçün təhsil aldıqları təhsil müəssisələrinə müraciət edərək imtahana buraxılması haqqında həmin təhsil müəssisəsi tərəfindən qərar qəbul edilən, əvvəlki illərdə keçirilmiş buraxılış imtahanlarında məqbul qiymət ala bilməyən, həmçinin üzrlü səbəbdən 2015-ci ildə keçirilən buraxılış imtahanlarında iştirak edə bilməyən cari ilin məzunu olan şagirdlər üçün də buraxılış imtahanları keçirilib.
Xaçmaz şəhərindəki akademik Zərifə Əliyeva adına 8 saylı məktəb-liseydə imtahanın gedişinə nəzarət edən imtahan rəhbəri Tofiq Süleymanov AZƏRTAC-a müsahibəsində prosesin uğurla həyata keçirildiyini qeyd edib: “Bu mərkəzdə imtahan vermək üçün 540 şagird qeydiyyatdadır. Şagirdlərin sərbəst imtahan verməsi üçün mərkəzdə ideal şərait yaradılıb. Şagirdlərə sualları cavablandırmaq üçün verilən müddət imtahanın tipindən asılı olaraq fərqlənir. Nəzarətçi müəllimlərimiz imtahanın gedişini diqqətlə izləyirlər. Hələ ki, heç bir qayda pozuntusu qeydə alınmayıb”.
Xatırladaq ki, respublikanın 14 şəhər və rayonunda keçirilən imtahanlar 64 imtahan mərkəzində təşkil edilib. İmtahanlara 314 imtahan rəhbəri və 2 min 742 nəzarətçi-müəllim cəlb olunub.
Bölmənin digər xəbərləri
