Şabranda Azərbaycanın miqrasiya qanunvericiliyi barədə maarifləndirici tədbir keçirilib VİDEO
Şabran, 4 mart, Elxan Yusifli, AZƏRTAC
Martın 4-də Dövlət Miqrasiya Xidməti Xaçmaz regional miqrasiya idarəsinin xidməti ərazisinə daxil olan rayonlarda yaşayan əcnəbi və vətəndaşlığı olmayan şəxslərin, vətəndaşların, aidiyyəti dövlət qurumları və ictimai təşkilatların nümayəndələrinin, işəgötürənlərin və sahibkarların iştirakı ilə maarifləndirici tədbir keçirib.
AZƏRTAC xəbər verir ki, Şabran şəhərində təşkil olunan tədbirdə Xidmətin aparatının səlahiyyətli nümayəndələri iştirakçılara Azərbaycanın miqrasiya qanunvericiliyi, ölkəmizdə əcnəbilər və vətəndaşlığı olmayan şəxslərin hüquqlarının qorunması ilə bağlı həyata keçirilən tədbirlər barədə ətraflı məlumat veriblər.
Tədbirdə İnzibati Xətalar Məcəlləsində 2016-cı ilin 1 mart tarixindən qüvvəyə minən yeniliklər və dəyişikliklər haqqında izahedici söhbət aparılıb. Bildirilib ki, Azərbaycan Respublikasında əcnəbiləri və vətəndaşlığı olmayan şəxsləri qəbul edən və ya onlara xidmət göstərilməsini, işə qəbul olunmasını təmin edən və digər vəzifələri yerinə yetirən müəssisə, idarə və təşkilatların vəzifəli şəxsləri əcnəbilərin və vətəndaşlığı olmayan şəxslərin qeydiyyata alınmasının və qeydiyyatdan çıxarılmasının, onlara Azərbaycan Respublikasında yaşama, bir yerdən başqa yerə getmə və yaşayış yerini dəyişdirmə hüququ verən sənədlərin tərtib olunmasının müəyyən edilmiş qaydalarının pozulmasına görə 300 manatdan 500 manatadək cərimə edilir. Həmçinin əcnəbilərə və vətəndaşlığı olmayan şəxslərə Azərbaycanda yaşayış sahəsi vermiş vətəndaşlar tərəfindən qanunvericiliklə müəyyən edilmiş qaydada onların vaxtında qeydiyyata alınması və qeydiyyatdan çıxarılması üçün tədbirlər görməməsinə görə də 300 manatdan 500 manatadək cərimə təyin edilir.
Daha sonra vətəndaşlıq məsələləri ilə bağlı məruzə dinlənilib.
Bölmənin digər xəbərləri
