CƏMİYYƏT
Azərbaycanın apostol prefekti yepiskop rütbəsinə layiq görülüb
Bakı, 9 dekabr, AZƏRTAC
AZƏRTAC Vatikan radiosunun rəsmi saytına istinadla xəbər verir ki, Müqəddəs Salsalı Fransisk Cəmiyyətindən (don Boskonun Saleziyalılar Cəmiyyətindən) olan Azərbaycanın apostol prefekti, keşiş Vladimir Fekete Müqəddəs Ata tərəfindən Munisipdə titulyar kafedrası olan yepiskop rütbəsinə layiq görülüb.
Vladimir Fekete ata 1955-ci ildə Bratislavada anadan olub. 1979-cu ildə Komenski adına Universitetin təbiət elmləri fakültəsini bitirib. 1981-ci ildə gizli yolla Müqəddəs Salsalı Fransisk Cəmiyyətində əbədi and içib və 1983-cü ildə Berlində keşiş rütbəsinə keçirilib. 1990-cı ildə kommunizm rejimi süqut edənə qədər Slovakiyada geoloq işləyib.
Ötən əsrin 90-cı illərində Vyana Universitetində və Lyublin Katolik Universitetində ilahiyyat üzrə təhsilini davam etdirib, bu universitetləri bitirərək ilahiyyat üzrə magistr dərəcəsi alıb. Saleziyalıların konqreqasiyasında müxtəlif vəzifələr tutub: rahiblər əyalətinin inspektorunun vikarisi (1993-1999), Bratislava rahiblər əyalətinin inspektoru (1999-2005), novisiyalıların rəhbəri (2006-2009). 2009-cu ildə Bakıda sui iuris missiyasının keşişi təyin edilib. 2011-ci il avqustun 4-də həmin missiya Azərbaycanın apostol prefekturasına çevrildiyi vaxtdan prefekt vəzifəsini tutur.