BDU-nun 100 illik yubileyinə həsr olunan bilik yarışmasının qalibləri mükafatlandırılıb
Bakı, 24 aprel, Ş.Abdullayeva, AZƏRTAC
Bakı Dövlət Universitetində (BDU) Təhsil Nazirliyinin “SABAH” qrupları layihəsi çərçivəsində cari ilin fevral-aprel ayları ərzində bu ali məktəbin 100 illik yubileyinə həsr olunmuş riyaziyyat, müəllimlik və informasiya texnologiyaları ixtisasları üzrə bilik yarışmasının qaliblərinin mükafatlandırılma mərasimi keçirilib. Tədbirdə Təhsil Nazirliyinin struktur rəhbərləri və əməkdaşları, Milli Məclisin deputatları, ali təhsil müəssisələrinin rektorları, təhsil ekspertləri, BDU-nun professor və müəllim heyəti, “SABAH”ın əməkdaşları, tələbələri və könüllüləri iştirak ediblər.
AZƏRTAC xəbər verir ki, tədbir Azərbaycan Respublikasının dövlət himninin səsləndirilməsi ilə başlanıb. Universitetin 100 illik yubileyi münasibətilə hazırlanmış videoçarxın nümayişindən sonra çıxış edən rektor Elçin Babayev bilik yarışmasının əhəmiyyətindən danışıb. Qeyd edib ki, bilik yarışmasının keçirilməsində məqsəd “SABAH” qruplarında təhsilin keyfiyyətini artırmaq, həmçinin elmi potensialı, istedadı, yaradıcı təfəkkürü olan tələbələri sağlam rəqabət şəraitində üzə çıxarmaq və onların inkişafına təkan verməkdir. Təhsil, elm, bilik, savadın gələcəyə açılan qapı və məsuliyyət olduğunu deyən rektor Elçin Babayev Prezident İlham Əliyevin gənclərlə, onların təhsili, sosial həyatı ilə bağlı sərəncamlarını ölkədə gənclərə göstərilən diqqət və qayğının bariz nümunəsi kimi dəyərləndirib. Vurğulayıb ki, tələbələr onlara yaradılan imkanlardan düzgün bəhrələnməli, gələcəyin layiqli vətəndaşı kimi yetişməli, ölkənin rifahı, davamlı inkişafı naminə çalışmalıdırlar. Rektor bütün qalibləri təbrik edərək onlara uğurlar arzulayıb.
Təhsil nazirinin müavini Firudin Qurbanov çıxışında ölkəmizdə ali təhsilə xüsusi diqqət yetirildiyini, məzunların əmək bazarında rəqabətədavamlılığını yüksəltmək məqsədilə islahatların həyata keçirildiyini deyib. O bildirib ki, islahatların əsas məqsədi təhsilin maddi-texniki bazasının yüksəldilməsinə nail olmaq, keyfiyyətinin müasir tələblərə cavab verməsini təmin etməkdir. “SABAH” qrupları təhsildə keyfiyyətin yüksəldilməsi, müasir tələblərə uyğun kadr hazırlığının təmin edilməsi və ali təhsil sistemində innovativ, rəqabətli tədris mühitinin yaradılması məqsədilə təşkil olunub. Amalımız davamlı, uzunmüddətli, hərtərəfli və əhatəli keyfiyyət dəyişikliklərinin həyata keçirilməsi üçün zəruri mühitin yaradılmasıdır. Eyni zamanda, Azərbaycan gənclərinin fərdi və peşəkar inkişafına nail olmaq, dünyanın aparıcı universitetləri ilə əməkdaşlıq layihələri, elmi-tədqiqat, təcrübə və tələbə mübadilələrinin genişləndirmək və əmək bazarının tələblərinə uyğun olaraq savadlı, bacarıqlı və hazırlıqlı gənclər yetişdirmək niyyətindəyik.
Firudin Qurbanov qeyd edib ki, ilk “SABAH” qrupları 2014-cü ildə ölkənin 7 ali təhsil müəssisəsində yaradılıb. 2017-ci ildə “SABAH”ın ilk buraxılışı olub. 722 nəfər məzunun 30 faizi həm dövlət, həm də özəl sektorda işlə təmin edilib, 53 faizi isə magistraturaya qəbul olunub. 2018-ci ildə məzunların say və keyfiyyət göstəriciləri daha da yüksəlib. Bu, bir daha sübut etdi ki, dövlətimizin ali təhsil sahəsində apardığı siyasət öz müsbət nəticəsini verir.
Nazir müavini bilik yarışını tələbələrin təlim və peşə hazırlığı üzrə biliklərinin dərinləşməsində və peşəkar kadr kimi yetişməsində mühüm addım kimi qiymətləndirib.
Bilik yarışmasında Bakı Dövlət Universiteti, Azərbaycan Dövlət Pedaqoji Universiteti (ADPU), Azərbaycan Texniki Universiteti, Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti, Azərbaycan Dillər Universiteti, Bakı Slavyan Universiteti, Azərbaycan Dövlət İqtisad Universiteti (UNEC), Bakı Mühəndislik Universitetinin tələbələri iştirak ediblər. İştirakçıların sayı ötən illə müqayisədə 40 faiz artıb və ümumilikdə 800-ə yaxın qeydiyyatdan keçən “SABAH” tələbəsini əhatə edib. Yarışmanın birinci mərhələsində 689, ikinci mərhələsində 161 tələbə iştirak edib, 28 tələbə final mərhələsinə vəsiqə alıb. Onlardan hər nominasiya üzrə üç nəfər olmaqla 9 nəfər qalib olub.
Riyaziyyat ixtisası üzrə bilik yarışmasında BDU-nun riyaziyyat müəllimliyi ixtisasının IV kurs tələbəsi Süleyman Bağırov I, BDU-nun riyaziyyat müəllimliyi ixtisasının IV kurs tələbəsi Rübabə Hüseynova II, BDU-nun kompüter elmləri ixtisasının III kurs tələbəsi Aygül Bayramova III yerə çıxıblar.
Müəllimlik ixtisası üzrə yarışda BDU-nun psixologiya ixtisasının II kurs tələbəsi Mərziyyə Əzməmmədova I, ADPU-nun ibtidai sinif müəllimliyi ixtisasının III kurs tələbəsi Çərkəz Kərimova II, BDU-nun kimya müəllimliyi ixtisasının II kurs tələbəsi Flora Bayramova III yerə layiq görülüblər.
İnformasiya texnologiyaları ixtisası üzrə bilik yarışmasında isə BDU-nun riyaziyyat müəllimliyi ixtisasının IV kurs tələbəsi Süleyman Bağırov I, BDU-nun kompüter elmləri ixtisasının III kurs tələbəsi Aygül Bayramova II, UNEC-in maliyyə ixtisasının III kurs tələbəsi Murad Qaraşov III yerin qalibi olublar.
Tədbir “SABAH” qrupları himninin sədaları altında bilik yarışmasının təşkili və “SABAH” qruplarının fəaliyyətini əks etdirən videoçarxların nümayişi ilə başa çatıb.
Xatırladaq ki, “SABAH” qrupları layihəsi çərçivəsində ikinci ildir keçirilən bilik yarışmasının məqsədi “SABAH” qrupları tələbələrinin elmi, yaradıcılıq potensialının üzə çıxarılması və nümayiş etdirilməsi, onların təhsil və bilik zəminində inteqrasiya etməsi, elmi-yaradıcı təşəbbüslərə həvəsləndirilməsi, araşdırma fəaliyyətinə təşviq edilməsi üçün əlverişli şəraitin yaradılmasıdır.
Bölmənin digər xəbərləri
