ELM VƏ TƏHSİL
Beynəlxalq təşkilatlarla aparılan məqsədyönlü işin nəticəsi Vətən müharibəsində özünü göstərdi
Bakı, 29 iyun, AZƏRTAC
Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində qazandığı Zəfər xalqımızın tarixinə düşdü.
Bu fikirləri AZƏRTAC-a açıqlamasında AMEA Hüquq və İnsan Haqları İnstitutunun böyük elmi işçisi Aidə Bəndəliyeva deyib.
O bildirib ki, 30 ilə yaxın işğal altında saxlanılan Azərbaycan torpaqlarının 44 gün ərzində hərbi yolla azad edilməsi Azərbaycan xalqının, onun şanlı ordusunun qəhrəmanlığının, Müzəffər Ali Baş Komandan İlham Əliyevin rəhbərliyi ilə həyata keçirilən diplomatiyanın təntənəsidir. Xarici dövlətlər və beynəlxalq təşkilatlarla aparılan fəal, məqsədyönlü işin praktik nəticələri Vətən müharibəsində özünü göstərdi. Bu, təməli ulu öndər Heydər Əliyev tərəfindən qoyulan daxili və xarici siyasətin ölkə Prezidenti İlham Əliyev tərəfindən uğurla aparılmasının bariz göstəricisi oldu: “Aparılan uğurlu siyasətin əsası 1993-cü ildə Azərbaycanın beynəlxalq müstəvidə itirilmiş nüfuzunun bərpa edilməsi, bir çox inkişaf etmiş xarici dövlətlərlə yeni əlaqələrin yaradılması ilə qoyuldu. Sonradan siyasi-iqtisadi, diplomatik və digər sahələrdə sürətlə inkişaf etdirilərək gərgin işlər aparıldı”.
Aidə Bəndəliyeva diqqətə çatdırıb ki, müstəqilliyimizin ilk illərində ümummilli lider Heydər Əliyevin, sonra isə onun davamçısı Prezident İlham Əliyevin uğurlu siyasətinin nəticəsi olaraq torpaqlarımızın işğaldan azad olunması uğrunda savaşa qalxan Azərbaycanın haqlı mübarizəsi dünya ölkələri tərəfindən dəstəkləndi. Haqqın və ədalətin gec-tez zəfər çalacağına inanan ölkələrin siyasi xadimləri, jurnalistləri, politoloqları öz çıxışlarında və yazılarında Azərbaycanın bu müharibədə haqlı mövqedə olduğunu, erməni vandalizminin qatı cinayətlərini tarixi faktlarla dünya ictimaiyyətinə çatdırdılar.
Bakının Azadlıq meydanında Vətən müharibəsində Qələbəyə həsr olunmuş Zəfər paradı zamanı Prezident İlham Əliyev öz çıxışında bu tarixi reallığın nəticəsini belə səciyyələndirib: “Biz bu illər ərzində güc toplayırdıq, həm siyasi müstəvidə, beynəlxalq təşkilatlar çərçivəsində, həm də ölkə daxilində iqtisadiyyatımızı gücləndirirdik, biz ordumuzu gücləndirirdik. Bunun nəticəsində Azərbaycan son illər ərzində çox uğurlu inkişaf yolu keçmişdir və ildən-ilə bizim üstünlüyümüz özünü daha qabarıq şəkildə büruzə verirdi. Ermənistan bizimlə rəqabət apara bilmədi. Mən son 17 il ərzində dəfələrlə demişdim ki, Ermənistan öz xoşu ilə bizim torpaqlarımızdan işğalçı qüvvələrini çıxarmasa, biz bu məsələni hərbi yollarla həll edəcəyik. Mən 2003-cü ildə Prezident vəzifəsinə seçiləndə Konstitusiyamıza və müqəddəs Qurani-Kərimə əl basaraq and içmişdim ki, Azərbaycanın ərazi bütövlüyünü qoruyacağam. Bu gün böyük qürur hissi ilə deyə bilərəm ki, Azərbaycan öz istədiyinə nail oldu, tarixi ədaləti, beynəlxalq hüququ bərpa etdi”.
Aidə Bəndəliyeva vurğulayıb ki, müharibədən ötən 7 ayda işğaldan azad olunmuş torpaqlarımızda aparılan böyük quruculuq işləri Azərbaycanın öz tarixi torpaqlarını geri qaytardığını, ərazi bütövlüyünü bərpa etdiyini bir daha dünyaya göstərdi. Ermənistan isə 30 ildə işğal etdiyi Azərbaycan ərazilərini xarabalığa çevirmişdi. Çünki Ermənistan işğalçı olduğunu dünyaya etiraf etməsə də, o torpaqların Azərbaycana məxsus olduğunu və azərbaycanlıların öz ata-baba yurdlarına qayıdacaqlarını bilirdi.
“Müzəffər Ali Baş Komandan İlham Əliyevin rəhbərliyi ilə şanlı Ordumuz Qələbə qazandı. Biz öz tarixi torpaqlarımızı işğaldan azad etdik. İndi isə bizim üçün yeni quruculuq dövrü başlayır”, - deyə Aidə Bəndəliyeva qeyd edib.