MƏDƏNİYYƏT
MAQSUD ŞEYXZADƏ HAQQINDA “İKİ XALQIN OĞLU” ADLI FİLM ÇƏKİLİR
Azərbaycan Dövlət Televiziya və Radio Verilişləri Şirkətinin “Telefilm” yaradıcılıq birliyi Azərbaycan və özbək xalqının böyük oğlu, yazıçı və dramaturq Maqsud Şeyxzadə haqqında “İki xalqın oğlu” adlı bədii-sənədli televiziya filmi çəkir. Filmin yaradıcı qrupu – ssenari müəllifi Eldar İskəndərzadə, quruluşçu rejissor Vasif Məmmədzadə və quruluşçu operator Mahir Cahangirov Daşkənddə olmuşlar. Onlar ədibin işlədiyi Nizami Gəncəvi adına Daşkənd Dövlət Pedaqoji İnstitutunda M.Şeyxzadənin tələbəsi, hazırda institutun professoru Həmidcan Həmidi, Özbəkistan Yazıçılar İttifaqının sədri, Özbəkistan Qəhrəmanı Abdulla Aripov, xalq şairi Şükrulla, Azərbaycanın Özbəkistandakı səfiri Aydın Əzimbəyov və yazıçı Qafur Qulamın qızı Almaz xanım Əhmədova ilə görüşmüş, onların xatirələrini lentə almışlar.
Çəkiliş qrupu Həmzə adına Özbəkistan Milli Dram Teatrında M.Şeyxzadənin “Mirzə Uluqbəy” tamaşasında olmuş, M.Şeyxzadə adına orta məktəbə getmiş, Ə.Nəvai adına ədəbiyyat muzeyində M.Şeyxzadəyə məxsus əşyalar və kitablar nümayiş etdirilən güşədə çəkilişlər aparmışlar.
Eldar İskəndərzadə AZƏRTAC-ın müxbiri ilə söhbətində demişdir: - Biz M.Şeyxzadənin doğulduğu Ağdaşda çəkilişlər aparmış, bacısı Səidə xanımı, qızı Aliməni, şairin tərcüməçisi İlyas Tapdığı və professor Pənah Xəlilovu lentə almışıq. İlin sonunadək filmi başa çatdırmaq fikrindəyik.