MƏTBUAT NÜMAYƏNDƏLƏRİ ATA ALYANSININ TİKİNTİ-QURAŞDIRMA SAHƏSİNDƏ DÜNYA SƏVİYYƏLİ QURĞU İLƏ TANIŞ OLMUŞLAR
AZƏRTAC xəbər verir ki, Azərbaycan Beynəlxalq Əməliyyat Şirkəti mətbuat nümayəndələrinin ATA-nın (Azfen-Tekfen-Amek alyansı) Bibiheybətdəki tikinti-quraşdırma sahəsinə tanışlıq səfərini təşkil etmişdir. Burada jurnalistlər tikinti sahəsinin yataqxana, yeməkxana, camaşırxana, idman kompleksləri, boru istehsalı, boyama və örtükləmə sexləri, təlim mərkəzi, ibadət otağı, tibb məntəqəsi, ofislər ilə tanış olduqdan sonra Xəzərdəki “Azəri” yatağında quraşdırılacaq kompressor və suvurma platformasına qalxmışlar.
KİV nümayəndələrinə bildirilmişdir ki, 9400 kvadratmetr sahəsi, 14,5 min ton ağırlığı olan bu platformanın tikintisində 2 min nəfər (onların 75 faizi Azərbaycan vətəndaşlarıdır) heç bir iş günü itirilmədən 4 milyon adam-saat qəzasız işləmişdir. Platformanın alt və üst göyərtələrində iri avadanlıq, o cümlədən 4 ədəd Rolls Royce RB-211 turbin mühərriki, 4 suvurma və 4 qazvurma qurğusu, enerji blokları, 383 vatt gücündə suvurma, 480 vatt gücündə qaz-vurma nasosları quraşdırılmışdır. Artıq tikintisinin 90 faizdən çoxu başa çatmış platformada sonuncu mərhələ - 125 metr hündürlüyündə, 450 ton çəkisində “Məşəl” qülləsinin gövdəyə 60 dərəcə maillikdə birləşdirilməsi, axırıncı yoxlama-sınaq işlərindən sonra barj üzərinə sürüşdürülərək dənizdəki daimi yerində-dayaq blokları üzərində su səthindən 13 metr hündürlükdə bərkidilməsi və dənizdə quraşdırılmış “Mərkəzi Azəri” qazma, texnoloji təchizat və yaşayış platforması ilə 70 metr uzunluğunda, 480 ton ağırlığında körpü vasitəsilə birləşdirilməsi əməliyyatları qalmışdır. Dünya sularında indiyədək bütün mövcud qurğulardan öz nadir layihə-əməliyyat imkanları və nəhəngliyi ilə seçilən bu platformanın dənizdə quraşdırılması prosesi 2005-ci ilin 3-cü rübünədək tamamlanacaqdır.
Layihə menecerləri bildirmişlər ki, bu platformanın inşası başa çatdıqdan sonra Faza 3 mərhələsi üçün təxminən eyni dəyərdə və həcmdə digər qazma, təchizat, yaşayış, kompressor və suvurma platformalarının tikintisinə başlanacaq, yenə də daha çox yaxşı təcrübə keçmiş yerli işçi qüvvəsindən istifadə ediləcəkdir.
ATA sahəsinə baxışdan sonra bp-nin “ Villa Petroleya”sının Xalçalı salonunda ABƏŞ-in layihələr üzrə məsul nümayəndələri jurnalistlərə 2004-cü ildə görülmüş işlər və bu il həyata keçiriləcək tədbirlər barədə məlumatlar vermişlər. Qeyd edilmişdir ki, ötən il əvvəlcədən proqnozlaşdırıldığı kimi, “Azəri-Günəşli-Çıraq” layihəsi üzrə 15 milyon adam-saat qəzasız iş yerinə yetirilmiş, “Mərkəzi Azəri” yatağında artıq işlərin 99 faizi tamamlanmış, dənizdən Səngəçal terminalına qədər çəkilişi başa çatmış sualtı boru kəməri sınaqdan keçirilmiş, “Qərbi Azəri” obyektlərində irəliləyiş 77 faiz, “Şərqi Azəri” obyektlərində 50 faiz olmuş, xərclənmiş vəsaitin məbləği 2004-cü ilin sonunadək 4,8 milyard ABŞ dolları, o cümlədən ötən il 2,1 milyard dollar təşkil etmişdir.
Bu il həyata keçiriləcək işlərə 1,7 milyard dollar xərclənəcəkdir. Azərbaycan vətəndaşlarından 9500 nəfəri bu layihələrin yerinə yetirilməsində işləyəcəkdir. Bakı-Tbilisi-Ceyhan boru kəmərinin tikintisində 1 milyard 81 milyon dollar dəyərində iş görülmüş, “Şahdəniz” layihəsində tikintinin 44 faizi, Cənubi Qafqaz boru kəmərində 54 faizi, Səngəçal terminalında 75 faizi yerinə yetirilmiş, 2 xam neft çəninin quraşdırılması başa çatdırılaraq istismar sınağından keçirilmişdir. Terminalda ARDNŞ-in obyektlərinə qaz nəql ediləcək boru kəmərinin tikintisi tamamlanmışdır. Dərinsulu “Günəşli” layihəsində mühəndis-layihə işlərinin 19 faizi, tədarük işlərinin 20 faizi görülmüşdür. İlin əvvəlindən qazma, texnoloji təchizat və yaşayış platformasının üst modullarının quraşdırılmasına başlanmışdır. 2-ci rübdə hasilat, kompressor, suvurma platformasının inşası start götürəcəkdir.
Sağlamlıq, əməyin təhlükəsizliyi və ətraf mühitin mühafizəsi məsələrinə xüsusi diqqət yetirən natiqlər vurğulamışlar ki, ötən il qəzasız 50 milyon adam-saat iş görülmüş, 9, 9 milyon dollar məbləğində sosial sərmayə layihələri maliyyələşdirilmişdir.
“Əsrin müqaviləsi”nin uğurla həyata keçirildiyini diqqətə çatdıran natiqlər Bakı-Tbilisi-Ceyhan əsas neft ixrac boru kəmərinin 2005-ci ilin ilk rübündə istifadəyə veriləcəyini və ilk neftin Ceyhan limanından Avropaya 2-ci rübün sonunda nəql ediləcəyinə əminliklərini də bildirmişlər.
Axırda ABƏŞ-in nümayəndələri jurnalistlərin çoxsaylı suallarını cavablandırmışlar.
Bölmənin digər xəbərləri
