Ötən il Qəbələnin təsərrüfatlarında süni üsulla mayalandırılan heyvanların sayı 412 baş artıb
Qəbələ, 10 yanvar, Mustafa Dadaşov, AZƏRTAC
Heyvandarlıq Qəbələ rayonunda əsas təsərrüfat sahələrindən biridir. Dövlətin aqrar sahəyə, o cümlədən heyvandarlığın inkişafına göstərdiyi hərtərəfli qayğı, damazlıq işinin təşkili və süni mayalandırma tədbirlərinə görə fermerlərə əlavə subsidiyaların ayrılması rayonda bu sahənin inkişafına güclü təkan verib.
Qəbələ Rayon Statistika İdarəsindən AZƏRTAC-ın bölgə müxbirinə bildirilib ki, son illər heyvandarlar süni mayalandırma ilə inəklərin cins tərkibinin dəyişdirilərək daha məhsuldar heyvanlarla əvəz edilməsində çox maraqlıdırlar. Belə ki, 2021-ci ildə rayonun şəxsi və fermer təsərrüfatlarında 8 min 624 baş, yəni əvvəlki ildəkindən 412 baş çox inək və düyə süni üsulla mayalandırılıb. Həmin müddətdə təsərrüfatlarda süni mayalanma ilə 5 min 185 baş cinsi yaxşılaşdırılmış buzov alınıb. Buzovların sayı isə əvvəlki illə müqayisədə 176 baş artıb.
Qurumdan verilən məlumata görə, ötən il rayonda 6 min 257,2 ton diri çəkidə ət, 40 min 891,7 ton süd, 22 milyon 971 min ədəd yumurta, 413,5 ton yun istehsal olunub. 2022-ci il yanvarın 1-dək rayonun təsərrüfatlarında 43 min 296 baş iribuynuzlu mal-qara, o cümlədən 21 min 301 baş inək və camış, 177 min 46 baş qoyun və keçi, 800 baş donuz saxlanılıb.
Bölmənin digər xəbərləri
