Almaniya bu il iqlim hədəfinə nail olmamaq riski ilə üzləşib
Berlin, 28 avqust, AZƏRTAC
Bu ilin birinci yarısında Almaniyada emissiyanın həcmi cüzi - 7 milyon ton CO₂ ekvivalenti azalıb. İstilik və nəqliyyat üçün elektrikləşdirmə sahəsindəki uğurlar iqlim balansına müsbət təsir göstərsə də, azalmanın əksəriyyəti böhran və qiymət dalğalanmaları ilə bağlıdır. Emissiyalar ilk altı ayda olduğu kimi, inkişaf etməyə davam edərsə, Almaniya 2026-cı ildə ilk dəfə təyin olunmuş iqlim hədəfinə çatma imkanını əldən verə bilər.
AZƏRTAC xəbər verir ki, bu, “Agora Energiewende” beyin mərkəzinin ilkin məlumatında əksini tapıb.
Məlumata əsasən, iyunun sonunadək Almaniyada emissiyanın həcmi təxminən 327 milyon ton təşkil edib. Bu, ötən ilin eyni dövrü ilə müqayisədə 7 milyon ton - 2 faiz azalma deməkdir. Azalmanın əsas səbəbi Hörmüz boğazının bağlanması nəticəsində neftin və qazın qiymətlərinin kəskin artması ilə qazıntı yanacağının qiymətlərində yaranan böhrandır. Nəticədə ilin birinci yarısında istehsal sektorunda fəaliyyət, yollarda yük maşınlarının hərəkəti azalıb, yüngül istilik yanacağının satışı kəskin aşağı düşüb. Eyni zamanda, istilik nasosları və elektrik avtomobillərinin yeni satış rekordları qırması Almaniyanın iqlim balansına müsbət təsir göstərib. Mərkəzin hesablamalarına görə, münaqişənin başlamasından bəri xam neft və təbii qaz idxalı ilə bağlı əlavə xərclər təxminən 7,4 milyard avro təşkil edir.
Qeyd edək ki, İqlim Mühafizəsi Qanununa görə, Almaniyanın 2026-cı il üçün emissiya həddi 625 milyon ton CO₂ ekvivalenti müəyyən edilib. “Agora Energiewende”nin ilk proqnozu göstərir ki, hazırkı azalma sürəti davam edərsə CO₂ emissiyaları 2025-ci illə müqayisədə ümumilikdə 13 milyon ton azalacaq. Halbuki 2030-cu il iqlim hədəfinə çatmaq üçün azalma ildə təxminən 40 milyon ton təşkil etməlidir. Almaniyanın 2030-cu ilədək emissiyanı 1990-cı illə müqayisədə 65 faiz azaltmağı qarşıya məqsəd qoyduğunu nəzərə aldıqda bu hədəfə çatmaq üçün növbəti illərdə emissiya daha sürətli azaldılmalıdır.
Bölmənin digər xəbərləri
