Qara dənizdə gərginlik Baltik buğdasına marağı artırıb
Bakı, 28 avqust, AZƏRTAC
Qara dəniz bölgəsindən taxıl daşımalarında yaranan fasilələr alıcıları alternativ bazarlara yönəldib. Türkiyə, Birləşmiş Ərəb Əmirlikləri və Sudan da daxil olmaqla bəzi ölkələr Baltik buğdasına maraq göstərir.
AZƏRTAC xarici mediaya istinadla xəbər verir ki, Rusiya və Ukrayna arasındakı gərginlik Qara dəniz üzərindən taxıl daşınmalarını pozaraq Baltik buğdasına tələbatı artırıb.
“CM Navigator” bazar monitorinqi şirkətinin məlumatına görə, avqust ayında Latviya, Litva və Estoniya limanlarından yüklənəcək təxminən 1 milyon ton buğda üçün rezervasiyalar artıq edilib. Bu göstərici ötən ilin eyni dövrü ilə müqayisədə təxminən 50 faiz artım deməkdir. İyul ayında isə rezervasiyalar illik müqayisədə üç dəfə artıb.
Bu mövsüm Baltikyanı bölgədə ixrac üçün təxminən 6 milyon ton buğda mövcuddur.
Analitiklər bildirir ki, Rusiya və Ukrayna avqust ayında buğda ixracında əhəmiyyətli dərəcədə azalma yaşayıb və yaranan kəsirin digər mənbələrdən ödənilməsi lazımdır.
Qeyd edək ki, Rusiya və Ukraynanın liman və dəniz nəqliyyatı infrastrukturuna artan hücumları Qara dənizdən daşınmaları məhdudlaşdırıb. Qlobal təkliflə bağlı narahatlıqlar fonunda bu həftə buğda qiymətləri son üç ilin ən yüksək səviyyəsinə çatıb.
Bölmənin digər xəbərləri
