SİYASƏT
Tacikistanın Azərbaycanın sülh siyasətinə dəstəyi İranın bölgədəki addımları ilə uzlaşmır
Bakı, 9 aprel, AZƏRTAC
Prezident İlham Əliyevın Tacikistana səfəri son bir il ərzində Azərbaycan tərəfindən Mərkəzi Asiya ölkələrinə qarşılıqlı əməkdaşlıq platformasının transformasiya olunmasının uğurlu davamıdır. Belə ki, son bir neçə il ərzində Azərbaycan Qazaxıstan, Özbəkistan və Türkmənistanla məhsuldar əməkdaşlıq quraraq siyasi, iqtisadi və hərbi sahədə yeni inkişaf perspektivlərini müəyyən edib.
Tacikistanla əməkdaşlıq da Azərbaycan üçün əhəmiyyətlidir. İki ölkə arasında tarixi otuz ilə söykənən diplomatik münasibətlər mövcuddur. Hər iki dövlət müstəqilliyinin ilk illərində ərazi problemi ilə qarşılaşıb.
Yeni dövrdə Tacikistanın Azərbaycanla əlaqələrini daha çox nəqliyyat, iqtisadiyyat, enerji resurslarının birgə işlənməsi və regional əməkdaşlıq müstəvilərindən qiymətləndirmək daha doğru olar.
Bu fikirləri AZƏRTAC-a açıqlamasında politoloq Amid Əliyev söyləyib.
Tacikistanın Çindən başlayan Böyük İpək yolunun mühüm hissəsini təşkil edən Azərbaycan vasitəsilə Avropa və dünya bazarına çıxışı əldə etməkdə maraqlı olduğunu deyən politoloq bildirib: “Bundan başqa, mövcud enerji mənbələrinin birgə işlənməsi və mübadiləsi də vacib sahələrdən biridir. Səfər zamanı Tacikistan Prezidenti Azərbaycan şirkətlərini enerji mənbələrini işləmək üçün rəsmi olaraq Tacikistana dəvət etdi. Hər iki dövlətin regional əməkdaşlıq perspektivləri də müzakirə mövzularından biri oldu. Bu baxımdan Azərbaycan Tacikistanla Şanxay Əməkdaşlıq Təşkilatı, Türk Dövlətləri Təşkilatı, eləcə də MDB çərçivəsində mümkün və gələcək əməkdaşlıq perspektivlərini nəzərdə keçirə bilər.
İki ölkəni birləşdirən əsas bağlardan biri də təbii ki, siyasi dəstəyin göstərilməsidir. Tacikistan artıq keçmişdə qalmış Qarabağ probleminin həllində Azərbaycanın mövqeyini hər zaman dəstəkləyib. Hətta İkinci Qarabağ müharibəsi zamanı Ermənistan Kollektiv Təhlükəsizlik Müqaviləsi Təşkilatını (KTMT) rəsmən bu prosesə qoşmaq istədikdə Tacikistan buna etirazını bildirdi. Sonrakı dövrdə KTMT qoşunlarının sərhəddə yerləşdirilməsi prosesində də Tacikistanın mövqeyi Azərbaycanla düz mütənasiblik təşkil etdi”.
A.Əliyev bildirib ki, Tacikisitan Mərkəzi Asiyada yerləşən yeganə farsdilli ölkə olduğundan hər zaman İranı bu bölgəyə cəlb edən əsas amillərdən biridir. İran hətta Tacikistanı özünün əsas tərəfdaşlarından biri hesab edir. Son zamanlar İranın Azərbaycana qarşı sərgilədiyi mövqeyi nəzərə alsaq deyə bilərik ki, bu səfər İranın formalaşdırdığı stereotipləri darmadağın etdi. Real olaraq Tacikistanın Azərbaycanla münasibətlərinin ən yüksək səviyyədə olduğu sübuta yetirildi. Tacikistanın bölgədə Azərbaycan tərəfindən təqdim olunan sülh siyasətinə dəstək verməsi İranın regionlar bağlı siyasəti ilə uzlaşmır. Çox güman ki, bu da fars-molla rejiminə xoş gəlməyəcək.
“Son günlər Azərbaycanda İrana meyilli casus şəbəkəsinin zərərsizləşdirilməsi, yersiz və mənasız notaya detallı cavabın verilməsi və İran səfirliyinin dörd əməkdaşının “persona non grata” elan edilməsinin üzərinə Tacikistanın dəstəyini də əlavə etsək, deyə bilərik ki, Mərkəzi Asiyada da İranın dinlə pərdələnmiş siyasəti özünə dəstək qazana bilməyəcək. Ermənistanla eyni hərbi-siyasi blokda yer alan Tacikistanın açıq şəkildə Azərbaycana dəstək göstərməsi İrəvanın KTMT-ni öz məqsədlərinin alətinə çevirmək istəyini də gözündə qoydu. Həm İran, həm də Ermənistanı birləşdirən vahid riyakar, terror və işğalçı siyasətin Azərbaycandakı bütün növ implementasiyaları məğlubiyyətə düçar olur. Dini radikalizmi və təxribatı dövlət səviyyəsində dəstəkləyən İranın həyata keçirdiyi belə siyasət gec-tez özünə və havadarlıq etdiyi Ermənistana qarşı silaha çevriləcək”, - deyə A.Əliyev vurğulayıb.