Abituriyent: Hədəfim yüksək bal toplamaq idi
Bakı, 11 iyun, Aysel Azadqızı, AZƏRTAC
Bu il II ixtisas qrupu üzrə ən yüksək nəticəni Bakı Türk Liseyinin (Türkiyə Dəyanət Vəqfi) məzunu Xədicə İsmayılzadə göstərib. O, hər iki mərhələnin nəticəsinə görə imtahanlarda 680.0 bal toplayıb.
Maraqlıdır ki, abituriyent bu nəticəni AZƏRTAC-dan öyrəndi – sevincini də elə həmin an bizimlə bölüşdü.
Xədicə deyir ki, imtahana ciddi şəkildə hazırlaşmağa 11-ci sinifdə başlayıb: “Demək olar, hazırlıqlar bütün günümü alırdı. Açığı, hədəfim yüksək nəticə toplamaq idi və bu nəticəyə çatdığım üçün çox sevinirəm”.
Onun sözlərinə görə, imtahanda ən çox sevdiyi riyaziyyat fənni üzrə suallara cavab yazarkən özünü daha rahat hiss edib, lakin coğrafiya fənnində müəyyən çətinliklər yaşayıb: “İmtahandan əvvəl olduqca həyəcanlı idim. Amma sualları görəndə həyəcanım azaldı və diqqətimi toplamağa başladım”.
Gələcək planlarından danışan Xədicə bildirir ki, ali təhsilini maliyyə ixtisası üzrə davam etdirmək istəyir: “Yəqin ki, UNEC, ADA və ya Bakı Ali Neft Məktəbində maliyyə ixtisasını seçəcəyəm. Magistratura təhsilimi isə xaricdə almaq istəyirəm”.
Uğurlu nəticənin arxasında çoxlu zəhmət dayandığını deyən abituriyentin bu yolu getmək istəyənlərə də bir tövsiyəsi var: “Abituriyentlərə çox oxumağı və vaxtlarını düzgün bölməyi tövsiyə edirəm. İnanıram ki, əzmlə çalışan hər kəs yüksək nəticəyə çata bilər”.
Xədicə İsmayılzadə qəbul imtahanının ikinci cəhdində də iştirak etməyi planlaşdırır.
Xatırladaq ki, Dövlət İmtahan Mərkəzi mayın 25-də II və III ixtisas qrupları üzrə qəbul imtahanı keçirib.
Bölmənin digər xəbərləri
