İDMAN
ABŞ səfirliyinin müşaviri: Azərbaycanda bu proqramın həyata keçirilməsi güləşin inkişafına töhfə verəcək
![ABŞ səfirliyinin müşaviri: Azərbaycanda bu proqramın həyata keçirilməsi güləşin inkişafına töhfə verəcək](/files/2024/2/1200x630/1716469724813563243_1200x630.jpeg)
Bakı, 23 may, AZƏRTAC
"Azərbaycanda bu proqramın həyata keçirilməsi güləşin inkişafına töhfə verəcək".
AZƏRTAC xəbər verir ki, bu sözləri ABŞ-ın Azərbaycandakı səfirliyinin mətbuat məsələləri üzrə müşaviri Vanessa Zenci Milli Paralimpiya Komitəsində təşkil olunan mətbuat konfransında deyib.
O bildirib ki, son iki ildə həm amerikalı, həm də azərbaycanlı güləşçilərin iştirakı ilə bir sıra layihələr reallaşıb: “Güləş insanları bir araya gətirən vasitələrdən biridir. Sevindirici hal odur ki, idman diplomatları qadın güləşçilərin sayının artmasına və inkişafına dəstək verir".
Qeyd edək ki, ABŞ-ın qadın güləşi üzrə 14 mütəxəssisi Azərbaycanda səfərdədir. Mayın 25-dək davam edəcək səfər çərçivəsində qonaqlar “Qız kimi güləş” şüarı altında ölkəmizin müxtəlif idman zallarında olacaq, ustad dərsi keçməklə yanaşı, yerli məşqçilərlə fikir mübadiləsi aparacaqlar.