ABŞ VƏ AVROPA BİRLİYİ İRANIN NÜVƏ PROQRAMI BARƏDƏ RAZILIĞA GƏLDİLƏR
Nəticədə, amerikalılar Böyük Britaniya, Fransa və Almaniyanın razılaşdırılmış mövqeyi qarşısında geri çəkilməli olmuşlar. Belə ki, əgər əvvəllər Vaşinqton İrana qarşı sanksiyaların tətbiqi üçün oktyabrın 31-ni son müddət kimi qoyulmasını tələb edirdisə, indi bu tarix noyabrın 25-nə keçirilmişdir.
Məhz həmin müddətədək BAEA İranın nüvə obyektlərində tam təftiş keçirməli və Tehranı uranın saflaşdırılması işlərindən tamamilə imtina etməyə çağırmalıdır. Bu barədə qətnamənin yeni şərhi beynəlxalq ekspertlərə işləmək üçün daha çox vaxt verəcəkdir.
Əslinə qalsa, sənədin yeni versiyasını qəti hesab etmək olmaz, çünki digər ölkələr, xüsusən də ÇXR onu son dərəcə sərt versiya adlandırır. Onlar qətnamədən “uranın saflaşdırılması” bəndini çıxarmağı təklif edirlər. Ona görə ki, həmin proses nüvə silahının yayılmamasına dair beynəlxalq sazişlərdə qadağan edilməmişdir.
Bu ara, İranda işləyən BAEA ekspertləri bildirmişlər ki, Tehran yaxınlığındakı Pərşin tədqiqat mərkəzində nüvə silahı yaradılması proqramının heç bir izini aşkarlamamışlar. Komissiyanın sədri Məhəmməd əl-Baradei demişdir: “BAEA-nın hesabatları ancaq faktlara əsaslanır və buna görə də bizim üçüncü tərəfin irəli sürdüyü ehtimallara ehtiyacımız yoxdur”.
Bölmənin digər xəbərləri
