ABŞ yaxın həftələrdə “qızıl kart” proqramını reallaşdırmağa başlayacaq
Bakı, 22 may, AZƏRTAC
May və iyun aylarında ABŞ Prezidenti Donald Trampın təşəbbüsü ilə buraxılan “qızıl kart” – ABŞ iqtisadiyyatına yatırılan 5 milyon dollar sərmayə müqabilində yaşayış icazəsi almaqda maraqlı olan şəxslərin müraciətlərini qəbul etməyə başlayacaq.
AZƏRTAC xəbər verir ki, “Axios” portalı bu barədə ABŞ-ın ticarət naziri Hovard Latnikə istinadla məlumat yayıb.
Nazirin fikrincə, həmin proqram ölkəyə cəlb olunan sərmayələr hesabına ABŞ-ın dövlət borclarını ödəməyə kömək edəcək. Bir müddət öncə ABŞ Prezidenti xarici ölkə vətəndaşlarının 1 milyona yaxın “Trump card” kimi də adlandırılan “qızıl kart” alacağına ümid etdiyini bildirib.
Qeyd edək ki, fevralın sonunda ABŞ-ın dövlət başçısı tərəfindən irəli sürülən “qızıl kart” təşəbbüsü yalnız indi icra mərhələsinə qədəm qoyur. Bu, son 35 il ərzində mövcud olan və Birləşmiş Ştatlarda 10 daimi iş yeri açmaq müqabilində xarici ölkə vətəndaşlarına “yaşıl kart” əldə etmək imkanı verən EB-5 proqramını əvəzləmək üçün nəzərdə tutulub.
Hovard Latnikin sözlərinə görə, ilk mərhələdə Trumpcard.gov saytı proqrama maraq göstərən şəxslərin müraciətlərini qəbul edəcək. Bundan sonra sistem ərizələrin işlənməsi və “qızıl kart”ların verilməsi üçün tam iş rejiminə keçəcək.
Bölmənin digər xəbərləri
