ABŞERON RAYON TƏHSİL İŞÇİLƏRİNİN KONFRANSI KEÇİRİLMİŞDİR
Rayon təhsil şöbəsinin müdiri Aslan Rüstəmov çıxış edərək, ölkəmizdə təhsilin inkişafında ulu öndərimiz, görkəmli dövlət xadimi Heydər Əliyevin müstəsna xidmətlərindən danışmış, Prezident İlham Əliyevin “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında” Fərmanının və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında” Sərəncamının əhəmiyyətini vurğulamışdır.
Natiq, həmçinin, ötən tədris ilinin yekunları və yeni dərs ilinə hazırlıq barədə məlumat vermişdir.
Qeyd olunmuşdur ki, rayonun təhsil ocaqlarının “İnkişaf Proqramı” hazırlanmış, orta məktəblərin maddi-texniki bazası möhkəmləndirilmişdir. Keçən tədris ilində rayonda orta məktəbi bitirən 1440 şagirddən 1040 nəfəri ali məktəblərə sənəd vermiş, onlardan 401 nəfəri tələbə adı qazanmışdır. Test imtahanlarında 38 məzun 500-dən çox bal toplamışdır.
Təhsil şöbəsinin müdiri məktəblərdə cari və əsaslı təmir işlərinin aparıldığını, Təhsil Nazirliyinin və rayon icra hakimiyyətinin məktəblərin maddi-texniki bazasının möhkəmləndirilməsinə kömək göstərdiklərini də diqqətə çatdırmışdır.
Tədbirdə təhsil nazirinin müavini İsgəndər İsgəndərov, rayon icra hakimiyyətinin başçısı Mirzə Novruzov və başqaları ümummilli liderimiz, dünya şöhrətli siyasi xadim Heydər Əliyevin siyasi kursunu ölkəmizin Prezidenti İlham Əliyevin uğurla davam etdirdiyini bildirmiş, Azərbaycan təhsilinin inkişafına göstərilən dövlət qayğısından danışmış, təhsil işçilərinə yeni dərs ilində uğurlar arzulamışlar.
Sonra təhsildə fərqlənən müəllimlərə və yüksək ballarla ali məktəblərə qəbul olunmuş məzunlara hədiyyələr təqdim edilmişdir.
Konfrans iştirakçıları adından Azərbaycan Prezidenti İlham Əliyevə müraciət qəbul olunmuşdur.
