REGİONLAR
Abşeronda Mehdi Hüseynzadənin anadan olmasının 100 illiyi qeyd edilib
Novxanı, 21 dekabr, Ətrabə Rzayeva, AZƏRTAC
Sovet İttifaqı Qəhrəmanı, Azərbaycanın igid oğlu Mehdi Hüseynzadənin (Mixaylo) anadan olmasının 100 illiyi münasibətilə Abşeron rayonunda silsilə tədbirlər keçirilir.
AZƏRTAC xəbər verir ki, bu münasibətlə dekabrın 21-də Abşeron rayonunun Mehdi Hüseynzadə adına Novxanı kənd 1 nömrəli tam orta məktəbində Milli Qəhrəmanın anadan olmasının 100-cü ildönümü qeyd edilib.
Tədbir iştirakçıları əvvəlcə Novxanı kəndində Azərbaycanın qəhrəman oğlunun şərəfinə ucaldılmış abidə önünə əklil qoyub, Mehdi Hüseynzadənin adını daşıyan məktəbdə onun xatirəsinə yaradılmış muzeylə tanış olublar.
Məktəbin akt zalında davam etdirilən tədbirdə Dövlət himni səsləndirilib, səhnəyə Dövlət bayrağı gətirilib. Daha sonra “Onun təxəllüsü Mixaylo idi” adlı sənədli film nümayiş etdirilib.
Məktəbin direktoru Taliyə Paşayeva qəhrəmanın həyat yolu haqqında ətraflı məlumat verib.
Sonra çıxış edən rayon icra hakimiyyətinin başçısı İradə Gülməmmədova bildirib ki, Prezident İlham Əliyev Böyük Vətən Müharibəsində faşizmə qarşı apardığı çoxsaylı uğurlu kəşfiyyat əməliyyatları və qəhrəmanlığı ilə böyük şöhrət qazanmış, Azərbaycan xalqının zəngin tarixi hünər salnaməsinə şanlı səhifələr yazan Mehdi Hüseynzadənin 100 illik yubileyinin qeyd edilməsi haqqında müvafiq sərəncam imzalayıb. Bu sərəncamdan irəli gələrək respublikamızda silsilə tədbirlər keçirilir.
“Böyük Vətən Müharibəsində qələbə qazanmağımızda Mehdi Hüseynzadənin misilsiz rolu, onun bir kəşfiyyatçı kimi ötürdüyü hərbi informasiyalar və ümumilikdə, Azərbaycan igidlərinin göstərdiyi şücaət danılmaz faktdır”, - deyən İ.Gülməmmədova qeyd edib ki, məhz belə qəhrəmanların rəşadəti sayəsində hərb tariximiz daha da zənginləşib, gənc nəsil üçün bir örnəyə çevrilib.
Xüsusilə qeyd edilib ki, sovetlər dövründə Mehdi Hüseynzadənin adının əbədiləşdirilməsinin təşəbbüskarı ümummilli lideri Heydər Əliyev olub.
Daha sonra “Əfsanəvi Mixaylo” kitabının müəllifi Şəmistan Nəzirli, “Abşeron” qəzetinin baş redaktoru Elimxan Mehrəliyev və digərləri Mehdi Hüseynzadənin qısa və şərəfli ömür yolundan, uzaq Adriatik dənizinin sahillərindəki Sloveniya kəndlərində başçılıq etdiyi partizan qrupu ilə birlikdə apardığı kəşfiyyat əməliyyatlarındakı uğurlarından söhbət açıblar.
Yubiley tədbirində şagirdlər ədəbi-bədii kompozisiyalar nümayiş etdirib, şeirlər söyləyib, mahnılar oxuyublar.