Adil Əliyev: Gəncə regional inkişafın hərəkətverici mərkəzinə çevrilib
Bakı, 2 fevral, AZƏRTAC
Dövlətimizin başçısı İlham Əliyev prezidentliyinin 18-ci ilində ölkənin ikinci ən böyük şəhəri, Azərbaycan Xalq Cümhuriyyətinin ilk paytaxtı olmuş, Nizami yurdu qədim Gəncəyə 18-ci səfərini etdi. Prezidentin Gəncəyə çoxsaylı səfərləri özü-özlüyündə bu şəhərə verilən əhəmiyyətin göstəricisidir. Hər səfər zamanı Gəncədə yeni sosial, iqtisadi, mədəni və digər obyektlərin açılış və yaxud da təməl qoyma mərasimləri keçirilir. Prezident İlham Əliyevin yanvarın 30-dakı səfəri də geniş spektrli obyektlərin açılışı və ya təməlinin qoyulması ilə yadda qaldı. Həmin sosial, iqtisadi, mədəni və digər layihələrin əlamətdar xüsusiyyəti ondan ibarətdir ki, onlar nəinki Gəncənin tərəqqisinə və Gəncə sakinlərinin rifahının yüksəldilməsinə xidmət edir, eləcə də bütün ətraf bölgələrin inkişafı üçün hərəkətverici qüvvə rolunda çıxış edirlər. Bu isə öz növbəsində regionların sosial-iqtisadi inkişafı, qeyri-neft sektorunun artımı və paytaxt Bakının yüklənməsinin qarşısının alınması üçün zəruridir. Qeyd edilənləri təsdiqləmək üçün Prezident İlham Əliyevin Gəncəyə budəfəki səfərinin təkcə bir aspektinə - lokomotiv deposunun istismara verilməsinə diqqət etmək kifayətdir.
AZƏRTAC xəbər verir ki, bu fikirləri Milli Məclis sədrinin müavini Adil Əliyev söyləyib.
A.Əliyev bildirib ki, Prezident İlham Əliyev yeni yaradılmış Gəncə lokomotiv deposunu işə saldı. Bu Bakıdakı Biləcəri deposundan sonra ölkədə ikinci depodur. Hər iki depo Azərbaycan Hökuməti ilə Fransa İnkişaf Agentliyinin birgə maliyyəsi ilə inşa edilib. Lokomotiv deposu ABŞ, Almaniya, İngiltərə, İtaliya, Fransa, Hollandiya kimi ölkələrin istehsalı olan qabaqcıl avadanlıq və cihazlarla təchiz edilib. İkinci deponun Gəncədə inşa edilməsi onun coğrafi yerləşməsi, iqtisadi və sənaye potensialı ilə əlaqədardır.
“Vaşinqtonda yerləşən İrs Fondunun Xarici Siyasət Araşdırmaları üzrə Allison Mərkəzinin direktoru Lyuk Koffey qeyd edir ki, “Gəncə dəhlizi” önəmli strateji dəyərə malikdir, çünki Asiyadan Avropaya uzanan çoxsaylı magistral, transmilli neft və qaz boru kəmərləri, fiber-optik xətlər, dəmir yolları, avtomobil yolları və mühüm beynəlxalq təchizat marşrutları məhz Gəncədən keçir. Şərq-Qərb nəqliyyat dəhlizinin vacib hissəsi olan Bakı-Tbilisi-Qars dəmiryolu xəttinin də buradan keçdiyini nəzərə aldıqda, Gəncə lokomotiv deposunun əhəmiyyəti aydın görünür. Digər tərəfdən Gəncənin ölkənin ikinci ən böyük şəhəri, iqtisadi-sənaye mərkəzi olması və ölkədaxili dəmir yollarının qovşağında yerləşməsi baxımından bu lokomotivin orada yaradılması iqtisadi məntiqə əsaslanır. Bu kontekstdə Daşkəsən rayonunda yerləşən qızıl və filiz yataqlarının mövcud olduğunu qeyd etmək lazımdır. Prezident İlham Əliyevin bildirdiyi kimi, Daşkəsən rayonunda dağ-mədən sənayesinin uğurla inkişafı da böyük dərəcədə Gəncədəki infrastrukturla bağlı olacaq. Bu yataqlardan səmərəli istifadə zəncirvarı sənaye kompleksinin formalaşdırılmasını tələb edir. Gəncənin sənaye potensialı o istiqamətdə xüsusi rol oynayacaq”, - deyə Adil Əliyev qeyd edib.
Milli Məclis sədrinin müavini deyib ki, Gəncə böyük sənaye potensialı ilə yanaşı, hava limanı, beynəlxalq dəmir yolları və magistral avtomobil yollarından ibarət tam inkişaf etmiş nəqliyyat infrastrukturuna malikdir. Yeni depo həmin infrastrukturu daha da gücləndirəcək. Gəncənin bu cür profili onun Daşkəsən və digər ətraf rayonlardan başqa, Vətən müharibəsində işğaldan azad edilmiş Qarabağ və Şərqi Zəngəzurun yenidən qurulmasına və inkişafına da mühüm töhfə verəcək. Gəncənin xüsusən Kəlbəcərin inkişafında rolu böyük olacaq. Çünki hazırda Kəlbəcərə gedən yeganə yol Gəncədən keçir. Kəlbəcərlə yanaşı Laçının təchizatında və tam reinteqrasiyasında Gəncə bir mərkəz rolu oynayacaq.
Onun sözlərinə görə, Gəncə dəmir yolu deposunun istismara verilməsindən bəhs edərkən, bir məqama da diqqət etmək lazımdır. Bu da həmin deponun enerji təchizatının bir hissəsinin qarşılanması məqsədilə deponun ərazisində 350 ədəd günəş panelinin quraşdırılmasıdır. Dəmiryolu hazırda dünyada ekoloji cəhətdən ən təmiz nəqliyyat növlərindən biri hesab olunur. Üstəlik dəmiryolunun fəaliyyətində hərəkətverici həlqə kimi çıxış edən lokomotivlərə texniki qulluq göstərilməsində bərpa olunan enerjidən istifadə edilməsi yenilik sayılmalıdır. Müasir, mütərəqqi dünyada bərpa olunan təmiz enerji mənbələrindən istifadə olunması ölkələrin yüksək inkişaf səviyyəsinin və mədəni kimliyinin aparıcı göstəricilərindən biri hesab olunur. Bu baxımdan Azərbaycanda son dövrdə həmin sahəyə verilən əhəmiyyət və Prezident İlham Əliyevin “yaşıl enerji” layihələrinə xüsusi diqqəti, o cümlədən Xızı-Abşeron Külək Elektrik Stansiyasının təməlinin qoyulması, Qarabağ və Şərqi Zəngəzurun yaşıl enerji zonası elan edilməsi qürurvericidir.
“Yekunda Milli Məclisin Gənclər və İdman komitəsinin sədri və ümumiyyətlə, idmana bağlı olan insan kimi məmnuniyyətlə qeyd etmək istərdim ki, hazırda Gəncədə Azərbaycanın ən böyük idman sarayı inşa olunur. Hətta Avropa oyunları, İslam oyunları kimi beynəlxalq idman tədbirlərinə ev sahibliyi etmiş paytaxt Bakıda bu böyüklükdə idman sarayı yoxdur. Bu isə regionların inkişafının daha bir parlaq göstəricisidir. Əminliklə demək olar ki, Gəncə sosial-iqtisadi, mədəni və idman sahələrində regional inkişafın hərəkətverici mərkəzinə çevrilib. Gəncənin belə inkişaf səviyyəsinə çatması böyük ölçüdə dövlətimizin başçısı İlham Əliyevin 2003-cü ildə prezidentliyinin ilk ayında verdiyi Fərmanı ilə 2004-cü ildən tətbiq edilməyə başlanmış Regionların sosial-iqtisadi inkişafı üzrə Dövlət Proqramlarının uğurla və effektiv surətdə həyata keçirilməsi sayəsində baş vermişdir”, - deyə Adil Əliyev diqqətə çatdırıb.
Bölmənin digər xəbərləri
