AFFA İntizam Komitəsi “Qəbələ” klubunun baş məşqçisini cəzalandırıb
Bakı, 7 sentyabr, AZƏRTAC
AFFA İntizam Komitəsinin növbəti iclası keçirilib.
AZƏRTAC qurumun rəsmi saytına istinadən xəbər verir ki, iclasda Azərbaycan Premyer Liqasının V turunda qeydə alınan qayda pozuntuları müzakirə olunub və onlara hüquqi qiymət verilib.
“Sabah” - “Turan Tovuz” matçında Bakı təmsilçisinin 5 futbolçusu sarı vərəqə ilə cəzalandığına görə klub 700 manat cərimə edilib.
Analoji cərimə “Zirə” ilə matçda 6 futbolçusu sarı vərəqə alan “Qəbələ” klubuna tətbiq olunub. Bundan başqa, həmin görüşdə “qırmızı-qaralar”ın baş məşqçisi Elmar Baxşıyev ikinci sarıdan qırmızı vərəqə aldığına görə 1 oyun cəzalanıb, klubunu isə 800 manat ziyana salıb.
Həmçinin 4 futbolçusu sarı vərəqə ilə cəzalandırılan “Zirə” klubu 700 manat məbləğində cərimələnib.
“Kəpəz” - “Araz-Naxçıvan” qarşılaşmasında meydan sahiblərinin 4 futbolçusu sarı vərəqə gördüyü üçün Gəncə təmsilçisi 700 manat cərimə edilib.
“Səbail” - “Qarabağ” oyununda isə hakimin final fitindən sonra meydançaya kənar şəxslər daxil olduğuna görə “dənizçilər” 800 manat cərimə ödəməli olacaqlar.
Bölmənin digər xəbərləri
