“MİTSULİFT” şirkəti 2019-cu ildən etibarən Bakıda və Azərbaycanın bölgələrində Yaponiya, Tailand, Koreya və Şanxay istehsalı olan “Mitsubishi” markalı bütün model lift və eskalatorların elektromexaniki quraşdırılmasını, hərtərəfli texniki xidmət işlərini, proqram təchizatını və ehtiyat hissələrinin təminatını həyata keçirir. Bu işləri həyata keçirmək üçün şirkət Azərbaycan Respublikasının qanunlarına müvafiq lisenziya, “Mitsubishi” zavod sənədlərinə, maddi-texniki bazaya, orijinal ehtiyat hissələrinə, yerli və xarici mühəndis və texniki heyətinə sahibdir. “Hər zaman mükəmməlliyə doğru” devizini əsas tutaraq məhsul və xidmət keyfiyyəti ilə fərq yaradan “MİTSULİFT” MMC bu müddət ərzində öndə gedən lider şirkətlərdən birinə çevrilə bilib. “MİTSULİFT” şirkətinin təsisçisi və direktoru Afiq Baxışov AZƏRTAC-ın suallarını cavablandırıb.

- “MİTSULİFT” şirkəti hansı zərurətdən yarandı?

-Ümummilli Lider Heydər Əliyevin siyasi kursunu böyük uğurla davam etdirən Prezident İlham Əliyevin həyata keçirdiyi sosial-iqtisadi siyasət nəticəsində ölkəmiz yeni inkişaf mərhələsinə qədəm qoyub, bütün sahələrdə müsbət göstəricilərə imza atıb. Artıq dünya birliyində öz layiqli yerini tutan, dayanıqlı və davamlı iqtisadi inkişafa nail olan Azərbaycan dünyanın ən inkişaf etmiş ölkələrindən birinə çevrilmək hədəfinə doğru böyük inamla irəliləyir, ötən hər ay, hər il bütün sahələrdə əldə olunan uğurlarla tarixə düşür. Bəli, bu gün reallaşdırılan mühüm layihələr nəticəsində ölkəmizdə makroiqtisadi sabitlik qorunub saxlanılır, iqtisadiyyatın şaxələnməsi uğurla təmin olunur, özəl bölmənin, sahibkarlığın inkişafı üçün daha əlverişli biznes və investisiya mühiti formalaşdırılır. Prezident İlham Əliyevin reallaşdırdığı məqsədyönlü siyasət hesabına özəl sektor yeni inkişaf dönəminə qədəm qoymaqla, sahibkarlığın inkişafına diqqət daha da artırılıb. Dövlətimizin başçısının sahibkarlara, yerli kadrların yetişməsinə yönəlik dəstəyindən ilhamlanaraq “MİTSULİFT” şirkətinin əsasını qoyduq. Şirkətimiz Yaponiyanın dünyaca məşhur “MİTSUBİSHİ ELECTRİC” Elevator's & Eskalator's-un standartları çərçivəsində fəaliyyət göstərir. Bizim missiyamız inkişaf etməkdə olan şəhər və infrastrukturları təhlükəsiz və sürətli liftlərlə, həmçinin eskalatorlarla təmin etmək, yerli sahibkarlara-müştərilərimizə tam şəffaf xidmət göstərmək, eyni zamanda, yerli kadrların inkişafına da töhfə verməkdir. Şirkətimiz bu illər ərzində “Mitsubishi” markasının avadanlıqlarının (lift və eskalatorlarının) quraşdırılmasını, texniki xidmətini, təmir işlərini, proqram, ehtiyat hissələrinin təminatını həyata keçirir.

-Bu gün rəhbərlik etdiyiniz şirkəti rəqiblərindən hansı üstünlüklər fərqləndirir?

-Mən deyərdim ki, “MİTSULİFT” şirkəti, ilk növbədə, xidmət keyfiyyəti ilə hər zaman öndədir. Halallıq, şəffaflıq, düzgünlük, heyətin nizam-intizamlı olması və əlbəttə ki, mütəxəssislərimizin peşəkarlığı. Şirkətimizin dayaq sütunları təcrübəli işçilərimizdir. Beynəlxalq standartlarla işləyən mühəndis və texniki işçilərdən ibarət, çevik koordinasiya olunan, təcrübəli komandamız kompleks layihələrin öhdəsindən uğurlu gəlir, fəaliyyətimizin hər bir mərhələsində: Layihələndirmə, quraşdırma, quraşdırma sonrası texniki xidmət zamanı bizim üçün ən vacib üç prinsipi - təhlükəsiz iş, keyfiyyətli iş və müştəri məmnuniyyətini rəhbər tuturlar.

Lift sahəsində olan böyük təcrübəmizlə yola çıxaraq 6 il ərzində “Mitsubishi” brendinə aid keyfiyyətli məhsulların müştərilərə çatdırılmasını təmin etmişik. Lift və eskalator quraşdırılması xidmətimiz müvafiq olaraq həmin məhsulları yeni tikililərdə, hündür göydələnlərdə, ticarət mərkəzlərində uyğun standartları qorumaqla quraşdırmağa nail olub. Lift quraşdırılması zamanı prioritetimiz standartları qorumaq və mövcud ola biləcək insan axınına qarşı planlamanı həyata keçirməkdir. Yaşayış və qeyri-yaşayış sahələrində quraşdırılan liftlərimiz hər zaman qiymət və xidmət keyfiyyətini qoruyub. Fəaliyyətini JIS standartları (Yapon Sənaye Standartları- Müxtəlif sənaye və sektorlarda ardıcıllıq, təhlükəsizlik və keyfiyyəti təmin etmək) əsasında quran və uzun illər ərzində bu standartlara sadiq qalan “Mitsubishi” dünya markaları arasında ən dözümlü brendlərdəndir. Onun hər hansı bir hissəsi asanlıqla sıradan çıxmır. Bu, bizim iş təcrübəmiz əsasında da öz təsdiqini tapıb. Necə deyərlər, yüksək yapon keyfiyyəti öz nəticəsini göstərir. Bir məqamı da qeyd edim ki, devalvasiya zamanı digər bütün brendlər öz keyfiyyətllərindən kəsdilər və ya alternativ bir model buraxdılar. “Mitsubishi” isə nə keyfiyyətini azaltmadı, nə də alternativlər təqdim etmədi. Brend sabit vəziyyətini saxladı və öz adını qorudu. Biz də brendin adını öz xidmətimizlə həmişə yüksək saxlamağa çalışırıq.

-Əməkdaşlarınızın peşəkarlığını artırmaq üçün hansı işlər görürsünüz?

- Mənim 16 illik “Mitsubishi” təcrübəm var. Həmçinin "MİTSUBİSHİ" elevators & escalators-un təşkil etdiyi təlimlərdə dəfələrlə iştirak etmişəm, bu işin ən xırda incəliklərinə qədər bilik və bacarıqlar qazanmışam. Bu gün isə artıq yerli kadrlar yetişdiririk. Əməkdaşlarımız təlim və təcrübə zamanı qazandığım biliklərdən vətənimizdə bəhrələnirlər.

-Dünyanın ən rahat, modern daşıma vasitələrindən biri olan lift və eskalatorların düzgün quraşdırılmaması, onların sistemindəki kiçik nasazlıqlar böyük fəlakətlərin yaranmasına, insan ölümlərinin baş verməsinə səbəb ola bilir. Bu baxımdan lift və eskalatorların standartlara uyğun şəkildə quraşdırılması, bu işlərin görülməsi zamanı insanların təhlükəsizliyinin təmin olunmasının önə çəkilməsi olduqca vacibdir. O zaman son vaxtlar liftlərlə bağlı yaranan xoşagəlməz halların səbəbkarları kimdir?

-Yaranan problemlərin səbəbini mən, ilk növbədə, düzgün seçim etməyən və ya edə bilməyən müştərilərdə görürəm. Bəzən sahibkarlar çox pul xərcləyib keyfiyyətli məhsul əldə etmək əvəzinə, ucuz və müvafiq olaraq da keyfiyyətsiz liftlə qənaətlənirlər. Bu isə gələcəkdə təəssüf ki, hansısa qəzaları və bədbəxt hadisələri qaçılmaz edir. Bu, artıq praktikada təsdiqlənmiş vəziyyət olduğundan biz “MİTSULİFT” şirkəti olaraq hər zaman müştərilərimizin diqqətini bu məqama yönləndirmək istəyirik. Biz hər ay müqavilə müddətinə uyğun olaraq liftlərə müntəzəm xidmət göstəririk. Bəzi iş adamları xəbərdarlıqlara baxmayaraq, bu məsələni gözardı edirlər. Lisenziyalı şirkətlərə müraciət etmək əvəzinə, qiymətin ucuzluğuna görə Çində, Türkiyədə sexlərdə istehsal olunan keyfiyyətsiz modelləri alırlar. Satış menecerlərinin də öz maraqları olduğundan şişirdilmiş təkliflər verirlər. Beləliklə də müştərini aldada bilirlər. Sahibkar bu qədər bina tikir, orada yaşayan bütün sakinlərin məsuliyyəti onun üzərindədir. Bu məsələlərə barmaqarası baxmaq olmaz. Diqqətli olmaq lazımdır. Hər hansı bir yaranacaq problemi qabaqcadan sığortalamaq vacibdir. Təəssüf ki, bəziləri bu gün 3 min xərcləməyin dərdindən, 3 gün sonra 50 min manat xərcləməyə hazırdırlar. Odur ki, ildə heç olmasa 1 dəfədən az olmayaraq göstərilən texniki baxışın keyfiyyətini yoxlamaq, liftlərin mövcud vəziyyətini bilmək üçün Fövqəladə Hallar Nazirliyinin (FHN) Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin ekspertləri tərəfindən liftlərə baxış keçirilməlidir. Sahibkar Agentliklə müqavilə bağlayaraq liftlərin sazlığını nəzarətdə saxlamalıdır. Bu, ilk növbədə, sahibkarın öz marağında olmalıdır.

-Texniki baxış hansı formada həyata keçirilir?

-Lift quraşdırıldıqdan sonra onun 3-cü prosesi texniki xidmətdir, yəni servis xidmətidir. Bu xidməti lifti quraşdıran təşkilat və ya satışı həyata keçirən şirkət həyata keçirə bilər. Bu sifarişçinin istəyindən asılıdır. Əgər biz quraşdırmadan sonra texniki xidmət müqaviləsini də bağlayırıqsa, o zaman mütəmadi olaraq müqavilədən asılı olaraq bir neçə dəfə texniki baxış həyata keçiririk.

Lift sayı 1-dən 4-ə qədər olduqda 1 iş günü, 4-dən yuxarı lift sayında isə 2-3 iş günü olmaqla texniki xidmət göstərilir. Texniki xidmət bizim təlim keçmiş peşəkar mütəxəssislərimiz tərəfindən aparılır. Müştərilərimizlə 3 formada xidmət müqaviləsi bağlanılır:

1.Ehtiyat hissəli

2.Ehtiyat hissəsi xaric

3. Bütöv növ çatışmazlıqları təmin edən VİP müqavilə

-2025-ci ildə hansı yeni layihələriniz gözlənilir?

-2024-cü il şirkətimiz üçün uğurlu əməkdaşlıqlar və yeni layihələrlə yadda qalan oldu. Ötən il ərzində ölkəmizin ən önəmli layihələrinin tenderlərində qalib olub, xalqımıza və müştərilərimizə keyfiyyətli xidmət göstərmişik. Məqsədimiz mükəmməlliyə nail olmaqdır. 2025-ci il üçün də böyük hədəflərimiz var. Mən əslən Azərbaycanın ən dilbər guşəsi olan Qarabağımızın göz bəbəyi Şuşadanam. Bizim də nəsibimizdir bir gün Şuşaya qayıtmaq. Zamanla bizə də o gün qismət olacaq, doğma yurdumuza qayıdacağıq. Mən çox istərdim ki, biz Qarabağ zonasında öz fəaliyyətimizi davam etdirək.

Allah bütün şəhidlərimizə rəhmət eləsin! Qazilərimizə cansağlığı versin! Bizim onların qarşısında kişilik borcumuz var. Allah Prezidentimizi də qorusun, 30 ildən sonra bizə torpaqlarımıza qovuşmaq səadətini yaşatdı!

-Müsahibə üçün təşəkkür edirik.

“MİTSULİFT” şirkəti ilə əlaqə:

http://www.mitsulift.az

[email protected]

Qaynar Xətt : +99470 535 50 50