AĞDAM RAYONUNDA QUŞLARIN KÜTLƏVİ TƏLƏFATI BARƏDƏ YAYILAN MƏLUMATLAR HƏQİQƏTƏ UYĞUN DEYİLDİR
Kənd Təsərrüfatı Nazirliyi yanında Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, bəzi qəzetlərdə Ağdam rayonunun Yüzbaşılı kəndində guya quşların kütləvi tələf olması barədə yayılan məlumatlar həqiqətə uyğun deyildir. Bu məlumatdan dərhal sonra Dövlət Baytarlıq Xidmətinin əməkdaşları həmin rayona ezam edilmişlər. Baytarlıq mütəxəssisləri rayonun Qərvənd, Yüzbaşılı, Xındırıstan, Bənövşələr və digər kənd və qəsəbələrində olmuş, hərtərəfli araşdırmalar aparmışlar. Müəyyən edilmişdir ki, rayonun adıçəkilən kənd və qəsəbələrinin heç birində ev quşlarının kütləvi tələfatı baş verməmişdir. Bununla belə buradakı quşlardan götürülmüş material nümunələri müayinə olunmaq üçün respublika baytarlıq laboratoriyasına göndərilmişdir.
Dövlət Baytarlıq Xidməti bir daha xatırladır ki, mətbuatda yayılmış məlumatların heç bir əsası yoxdur. Hazırda respublikada quş qripi xəstəliyinə qarşı kompleks mübarizə tədbirləri həyata keçirilir.
Bölmənin digər xəbərləri
