AĞDAŞDA 20 YANVAR FACİƏSİ İLƏ ƏLAQƏDAR SİLSİLƏ TƏDBİRLƏR KEÇİRİLMİŞDİR
Ağdaş, 19 yanvar (AZƏRTAC). 20 Yanvar faciəsinin növbəti ildönümü ilə əlaqədar Ağdaş rayonunda bir sıra tədbir keçirilmişdir.
Rayon İcra hakimiyyəti tərəfindən hazırlanmış tədbirlər planına uyğun olaraq, yanvarın 18-19-da təhsil və mədəniyyət müəssisələrində 20 Yanvar şəhidlərinin xatirəsinə həsr olunmuş ədəbi-bədii tədbirlər keçirilmiş, kitab və fotoşəkillər nümayiş etdirilmiş, orta məktəblərdə tarixin qanlı səhifəsi olan 20 Yanvar faciəsi haqqında xüsusi dərslər təşkil edilmişdir. Həmçinin Ağdaş şəhərindəki Şəhidlər xiyabanında və Məşəd kənd qəbiristanlığındakı şəhid məzarlarının ətrafında təmizlik və abadlıq işləri görülmüşdür.
Rayon İcra hakimiyyəti və Ağdaş bələdiyyəsi tərəfindən 1990-cı il yanvarın 20-də Bakıda şəhid olmuş ağdaşlı Müşfiq İsayevin ailəsinə humanitar yardım verilmişdir. Şəhidin adını daşıyan orta məktəbdə isə onun xatirəsinə həsr olunmuş anım mərasimi keçirilmişdir.
Bölmənin digər xəbərləri
