Ağstafa rayonunda daha bir məktəb binasının təməlqoyma mərasimi keçirilmişdir
Ağstafa, 31 oktyabr (AZƏRTAC). Ağstafa rayonunun Eynallı kəndində 300 yerlik yeni məktəb binasının təməlqoyma mərasimi keçirilmişdir.
AZƏRTAC xəbər verir ki, bu münasibətlə keçirilən mərasimi açan rayon icra hakimiyyətinin başçısı Məhərrəm Quliyev məktəb binasının tikintisinin başlanılması münasibətilə kənd sakinlərini və müəllim kollektivini təbrik etmişdir.
O, son dövrdə rayonda aparılan tikinti quruculuq işləri barədə ətraflı məlumat verərək bildirmişdir ki, rayonun ümumtəhsil məktəblərinin maddi-texniki bazasının möhkəmləndirilməsi istiqamətində məqsədyönlü işlər aparılır. Ənənəvi olaraq hər tədris dövründə yeni-yeni məktəb binaları istifadəyə verilir. Cari tədris ilində 3 məktəb binası tikilmiş, Kolxəlfəli məktəbinin təməli qoyulmuş, yaxın zamanlarda isə daha 5 məktəb binasının tikintisinə başlanılacaqdır.
Sonra şəhid atası Rza İsmayılov, məktəbin direktoru Mövsüm Paşayev, kənd ağsaqqalı Teyyub Hüseynov və başqaları çıxış edərək yeni məktəb binasının tikintisinə görə ölkəmizin başçısı İlham Əliyevə minnətdarlıqlarını bildirmişlər.
Mərasimin sonunda məktəb binasının təməli qoyulmuşdur.
Bölmənin digər xəbərləri
