Tədbirin iştirakçıları əvvəlcə ümummilli lider Heydər Əliyevin xatirəsini yad edərək, ulu öndərin İqtisad Universitetindəki büstünün önünə gül dəstələri düzmüşlər. Daha sonra milli təhlükəsizlik naziri Eldar Mahmudov və qonaqlar universitetdə yaradılmış Heydər Əliyev Mərkəzi ilə tanış olmuşlar.

Universitetin rektoru, Milli Məclisin elm və təhsil daimi komissiyasının sədri, professor Şəmsəddin Hacıyev diqqətə çatdırmışdır ki, bu günlərdə anadan olmasının 85 illiyi qeyd olunan akademik Əhməd Mahmudov görkəmli alim, istedadlı təşkilatçı, təvazökar, qayğıkeş və müdrik insan idi. Rektor akademikin nəsillərə örnək olan xeyirxah əməllərindən danışmışdır.

Bildirilmişdir ki, yubiley ərəfəsində Milli Məclisin iqtisadi siyasət daimi komissiyasının sədri, akademik Ziyad Səmədzadənin rəhbərliyi altında akademik Əhməd Mahmudovun respublika iqtisadiyyatının aktual problemlərinə həsr olunmuş bir sıra əsərləri toplanaraq nəfis tərtibatla kitab şəklində çap olunmuşdur.

Hər bir insanın öz əməlləri ilə tanındığını vurğulayan rektor, vaxtilə bu universitetdə təhsil almış Əhməd Mahmudov kimi məzunlar ilə fəxr etdiklərini bildirmiş, qeyd etmişdir ki, görkəmli akademik Vətəninə, xalqına, doğulub boya-başa çatdığı torpağa bağlılığı ilə hər bir iqtisadçının qəlbində abidə ucaltmışdır. Akademikin yalnız özünün deyil, övladlarının da bu universitetdə təhsil aldıqlarını diqqətə çatdırmışdır. Qeyd edilmişdir ki, alim tərəfindən aparılmış elmi araşdırmaların nəticəsi olaraq müxtəlif illərdə nəşr edilmiş bu məqalələrin toplandığı kitab bu gün də baş verən iqtisadi proseslərlə həmahəngdir.

Mərasimdə respublikanın tanınmış alimləri və ictimai-siyasi xadimləri - akademik Asəf Nadirov, Milli Məclisin aqrar siyasət daimi komissiyasının sədri Eldar İbrahimov, Bakı Dövlət Universitetinin rektoru, akademik Abel Məhərrəmov, iqtisadçı alim, professor Sadıq Salahov, Azərbaycan Respublikası Prezidenti yanında Dövlət İdarəçilik Akademiyasının rektoru Seyfəddin Qəndilov, Prezident yanında Sahibkarlar Şurasının sədr müavini Qüdrət Kərimov, Milli Məclisin deputatı Xanhüseyn Kazımlı akademik Əhməd Mahmudovun böyük elmi və ictimai fəaliyyətindən danışmış, yüksək insani keyfiyyətləri ilə bağlı xatirələrini söyləmişlər.

Diqqətə çatdırılmışdır ki, ölkəmizdə iqtisad elminin inkişafında müstəsna xidmətləri olan Əhməd Mahmudovun zəngin elmi və təşkilatçılıq fəaliyyəti bütünlüklə Azərbaycan Elmlər Akademiyasının İqtisadiyyat Bölməsi və 1958-ci ildən bu bölmənin əsasında yaranan İqtisadiyyat İnstitutu ilə bağlı olmuşdur.

Akademik Əhməd Mahmudov 1958-1964-cü illərdə İqtisadiyyat İnstitutu direktorunun elmi işlər üzrə müavini, 1964-cü ildən ömrünün sonunadək bu elm mərkəzinin direktoru olmuşdur. Ə.Mahmudov 1956-cı ildə namizədlik, 1968-ci ildə doktorluq dissertasiyalarını müdafiə etmiş, 1972-ci ildə AMEA-nın müxbir üzvü, 1983-cü ildə isə həqiqi üzvü seçilmişdir.

Alimin AMEA-nın İqtisadiyyat İnstitutunun elmi istiqamətlərinin müəyyənləşdirilməsində də əvəzsiz xidmətləri olduğu qeyd edilmişdir. Vurğulanmışdır ki, akademik Ə.Mahmudov 200-dən artıq elmi əsərin, monoqrafiya və dərsliyin, elmi məqalələrin və metodik vəsaitlərin müəllifi olmuş, təqdim edilən kitabda bu materialların yalnız bir qismi toplanmışdır.

Əhməd Mahmudovun elmi əsərlərinin əhəmiyyətini vurğulayan akademik Ziyad Səmədzadə, Azərbaycan iqtisadi fikrinin qədim tarixə malik olduğunu qeyd etmiş, bu sahədə çalışmış mütəfəkkirlərin elmi irsinin təbliğinin mühüm əhəmiyyətə malik olduğunu bildirmişdir. “Elmi irsimizi qoruyaq” rubrikasında dərc olunmuş kitabı elm aləmi üçün şərəfli hadisə adlandıran Z.Səmədzadə bu əsər üzərində bir il yarım müddətdə iş aparıldığını, yalnız kompyuter vərəqlərinin sayının 12 mini ötdüyünü diqqətə çatdırmışdır. Vurğulanmışdır ki, alimin tədqiq etdiyi məsələlərin elmi aktuallığı nəzərə alınmış, 8 bölmədən ibarət kitabda materiallar qruplaşdırılarkən Azərbaycan iqtisadiyyatının yeni tendensiyaları əsas götürülmüşdür.

Qeyd olunmuşdur ki, Əhməd Mahmudov, sözün əsl mənasında, Azərbaycan torpağının imkanları haqqında geniş informasiyaya, ətraflı biliyə malik idi. Ümummilli lider Heydər Əliyevin ötən əsrin 70-ci illərində respublikaya rəhbərlik etdiyi dövrdə ölkə iqtisadiyyatının yenidən qurulması, kənd təsərrüfatının sürətlə inkişaf etdirilməsi məhz bu cür elmi yanaşmanın əsasında mümkün ola bilərdi. Ə.Mahmudov tədqiqatlarında elmi və əməli surətdə sübut edirdi ki, kənd təsərrüfatının strukturunun təkmilləşdirilməsi, maddi-texniki bazanın yenidən qurulması üçün sərf edilən maddi-maliyyə resursları yüksək səmərə ilə nəticələnəcəkdir. Təsadüfi deyildir ki, uzun müddət Əhməd Mahmudov kənd təsərrüfatının intensivləşdirilməsi problemləri, eyni torpaq sahəsinə əlavə vəsaitlər qoyuluşu və əmək sərfi nəticəsində ikinci diferensial rentanın yaranması sahəsində geniş tədqiqat işləri aparan görkəmli sovet alimlərindən biri hesab olunmuşdur. Alimin tədqiqatlarının bu gün də aktuallığını saxladığı, regionların sosial-iqtisadi inkişafı ilə bağlı Prezident İlham Əliyevin təşəbbüsü və rəhbərliyi ilə həyata keçirilən Dövlət proqramlarının reallaşması istiqamətində mühüm əhəmiyyət kəsb etdiyi vurğulanmışdır.

Akademik Əhməd Mahmudovun oğlu, milli təhlükəsizlik naziri Eldar Mahmudov mərasimdə çıxış edərək kitabın ərsəyə gəlməsində zəhməti olanlara ailələri adından təşəkkür etmiş, atası haqqında söylənən xoş fikirlərə görə minnətdarlığını bildirmişdir.

“Azərbaycanın görkəmli elm xadimləri” seriyasından çap edilmiş kitabı əlamətdar hadisə adlandıran E.Mahmudov qeyd etmişdir ki, xalqımızın görkəmli elm xadimləri və şəxsiyyətləri haqqında belə kitablar daha çox və müxtəlif dillərdə nəşr olunmalı, geniş yayılaraq Azərbaycan elminin potensialını bütün dünyada tanıtmalıdır. Bunun üçün bu gün Azərbaycan hər cür şəraitə malikdir. O, vurğulamışdır ki, bu istiqamətdə inkişaf xəttinin əsasını ulu öndərimiz Heydər Əliyev qoymuş və Prezidentimiz İlham Əliyev tərəfindən uğurla davam etdirilir.

Atasının “Hər şey torpaqdan başlanır” fikrini xatırladan nazir qeyd etmişdir ki, bu gün geniş dünyagörüşlü, xalqa və dövlətə sadiq vətənpərvərlər yetişdirmək vacib vəzifələrdəndir.

Azərbaycanın milli təhlükəsizliyinin təmin edilməsi, milli maraqların qorunması, hər cür təhdidlərin qarşısının alınması məqsədilə son illər Milli Təhlükəsizlik Nazirliyində aparılmış struktur dəyişiklikləri, maddi-texniki bazanın gücləndirilməsi, fəaliyyətin məqsədyönlü və səmərəli təşkili, onun konkret nəticələri üzrə görülmüş işlər barədə də mərasim iştirakçılarına ətraflı məlumat verilmişdir.

Sonda Eldar Mahmudov atasının xatirəsinə göstərilən ehtirama görə bir daha minnətdarlığını bildirmişdir.

######