ALMANİYA İŞSİZLİYİN ARTIM SƏVİYYƏSİNƏ GÖRƏ AVROPA BİRLİYİNDƏ BEŞİNCİ ÖLKƏDİR
Statistika İdarəsinin son məlumatında bildirilir ki, Birlik məkanında 2005-ci ilin yanvar ayında qeydə alınan işsizlərin sayında ötən doqquz ay müddətində heç bir azalma və ya artım baş verməmişdir. İşsizliyin səviyyəsi olduğu kimi qalmaqdadır.
EUROSTAR-ın hesablamaları göstərmişdir ki, Avropa Birliyinin üzvü olan 25 ölkə arasında işsizliyin ən yüksək səviyyəsi yenə də Polşada (17,5 faiz), Slovakiyada (15,2 faiz), Yunanıstanda (9,9 faiz), İspaniyada (9,8 faiz), Almaniya və Fransada (hər iki ölkədə müvafiq olaraq 9,6 faiz) dəyişməz olaraq qalmaqdadır.
Avropa Birliyi məkanında işsizlik səviyyəsinin 5 faizi ötüb keçməməsi norma kimi müəyyənləşdirilmişdir.
Avropa Statistika İdarəsi məlumatda xatırladır ki, 2005-ci ilin yanvarında işsizlərin sayı İrlandiyada 4,3, Lüksemburqda 4,4, Avstriyada 4,5, Böyük Britaniyada 4,6 faiz olmuşdur.
Niderland və Danimarkada işsizlik 4,7 faiz olmuşdur. Bu ölkələr AB-nin müəyyənləşdirdiyi 5 faiz norma həddinin qorunub saxlanmasına riayət etmişlər.
