Almaniya Prezidenti Münxendə hücumun baş verdiyi ərazidə təşkil olunan xatirə mərasimində iştirak edib
Berlin, 14 fevral, AZƏRTAC
Almaniya Prezidenti Frank-Valter Ştaynmayer və Bavariya əyalətinin Baş naziri Markus Söder Münxendə əfqan miqrantın ötən gün avtomobillə insanların üzərinə hücum etdiyi ərazidə təşkil olunan xatirə mərasimində iştirak ediblər.
AZƏRTAC yerli mediaya istinadla xəbər verir ki, Almaniya Prezidenti hadisə barədə qısa açıqlama da verib: “Bu hücumun amansızlığı bizi dərindən sarsıdır və çaşqınlıq yaradır”.
Prezident hücumu törədən şəxsin təsadüfi insanları öldürmək və yaralamaq niyyətində olduğunu vurğulayaraq, onun qanun qarşısında cavab verəcəyini deyib. Frank-Valter Ştaynmayer polis və təcili yardım işçilərinə təşəkkürünü də ifadə edib.
Xatırladaq ki, ötən gün Münxendə əfqan miqrantın avtomobili insanların üzərinə sürməsi nəticəsində azı 30 nəfər xəsarət alıb.
Münxen şəhərinin meri Diter Rayter xəsarət alanlardan 10-a yaxının, o cümlədən bir uşağın vəziyyətinin ağır olduğunu bildirib.
Hücumu törədən şəxsin - Almaniyada sığınacaq axtaran 24 yaşlı əfqan miqrantın əvvəllər narkotik maddə və oğurluq halları ilə əlaqədar polis tərəfindən saxlanıldığı müəyyən edilib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
