Almaniyada radikal sağ iki qrupun üzvü olan 189 nəfərin axtarışı davam edir
Berlin, 2 yanvar, AZƏRTAC
Almaniyanın Daxili İşlər Nazirliyi alman dövlətini qəbul etməyən radikal sağ “İmperiya vətəndaşları” və “Özidarəedicilər” adlı qrupların üzvləri olan 189 nəfərin axtarışda olduğunu açıqlayıb.
AZƏRTAC yerli mediaya istinadla xəbər verir ki, bu barədə nazirliyin Sol Partiyanın sorğusu ilə bağlı cavabında qeyd olunub.
Həmin 189 nəfər haqqında ümumilikdə 254 halda həbs qərarı qəbul olunub. Həbs qərarının 20-si siyasi motivlərlə törədilən zorakılıq, 77-si hədə-qorxu gəlmə, saxtalaşdırma kimi siyasi əsaslarla törədilən cinayətlərlə bağlıdır. Digərləri isə siyasi motivli olmayan ümumi cinayətlərdir.
Axtarılan şəxslərin 20-sinin ölkə xaricində olduğu ehtimal edilir, bəziləri isə illərdir axtarışdadır. Ötən ilin mart-sentyabr aylarında hər iki qrupun üzvlərindən ümumilikdə 93 nəfər saxlanılıb.
Almaniya Federativ Respublikasının mövcudluğunu qəbul etməyən və ölkənin İkinci Dünya müharibəsində qalib gəlmiş dövlətlərin hələ də işğalı altında olduğunu iddia edən “İmperiya vətəndaşları” qrupu Almaniya İmperiyasının yenidən qurulmasını hədəfləyir. Özlərini Almaniya Federativ Respublikasının vətəndaşları hesab etməyən digər qrupun üzvləri isə vergi ödəməkdən və inzibati cəzalardan boyun qaçırırlar.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
