QAN YADDAŞI
AMEA-da Xocalı soyqırımının iyirminci ildönümü ilə əlaqədar konfrans keçirilmişdir
Bakı, 24 fevral (AZƏRTAC). Fevralın 24-də Azərbaycan Milli Elmlər Akademiyası (AMEA) Fəlsəfə, Sosiologiya və Hüquq İnstitutunda Xocalı soyqırımının iyirminci ildönümünə həsr olunmuş elmi konfrans keçirilmişdir.
AZƏRTAC xəbər verir ki, əvvəlcə Xocalı şəhidlərinin xatirəsi bir dəqiqəlik sükutla yad edilmişdir.
İnstitutun direktoru, professor İlham Məmmədzadə XX əsrin ən dəhşətli hadisəsi olan Xocalı qətliamı və onun ağır nəticələrindən söz açmışdır.
Bildirilmişdir ki, Xocalı faciəsi iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir. Erməni millətçilərinin başlıca məqsədi Dağlıq Qarabağı və digər Azərbaycan torpaqlarını ələ keçirmək, xalqımızın müstəqillik və ərazi bütövlüyü uğrunda mübarizə əzmini qırmaq idi. Doğrudur, faciə bütün Azərbaycan xalqını sarsıtmış, Xocalı sakinlərinə sağalmaz yaralar, mənəvi zərbələr vurmuşdur. Lakin xocalılılar hətta amansız soyqırımı günündə də özlərini əsl qəhrəman kimi aparmış, erməni-sovet hərbi birləşmələrinə qarşı qeyri-bərabər döyüşdə igidliklə vuruşmuş, düşmən qarşısında əyilməmiş, xalqımızın qəhrəmanlıq tarixinə şərəfli səhifələr yazmışlar.
Xocalıdan olan məcburi köçkün, Azərbaycan Respublikasının Prezidenti yanında Dövlət İdarəçilik Akademiyasının dosenti, tarix elmləri namizədi Həvva Məmmədova tarixi faktlara istinad edərək həmin hadisələrin mahiyyətindən danışmışdır. Vurğulanmışdır ki, ümummilli lider Heydər Əliyev xalqın təkidi və tələbi ilə yenidən hakimiyyətə qayıtdıqdan sonra onun səyi nəticəsində Xocalı faciəsinə hüquqi-siyasi qiymət verilmişdir.
Konfransda “Xocalı soyqırımı demokratik dəyərlər və beynəlxalq hüquqa qəsd kimi”, “Xocalı soyqırımı və qadın hüquqları”, “Xocalı qətliamının soyqırımı kimi tanınmasının prosessual-hüquqi aspektləri”, “Soyqırımı cinayətləri ilə mübarizədə beynəlxalq təcrübə” və digər mövzularda məruzələr dinlənilmişdir.
Tədbir çərçivəsində faciənin dəhşətlərini əks etdirən sənədli film nümayiş olunmuşdur.