AMEA-NIN BİOLOGİYA ELMLƏRİ BÖLMƏSİNİN İLLİK FƏALİYYƏTİNƏ HƏSR EDİLMİŞ HESABAT YIĞINCAĞI KEÇİRİLMİŞDİR
AZƏRTAC xəbər verir ki, Azərbaycan Milli Elmlər Akademiyasında bu qurumun biologiya elmləri bölməsinin 2004-cü ildə elmi və elmi-təşkilati fəaliyyətinə həsr olunmuş hesabat yığıncağı keçirilmişdir.
Foyedə bölmənin elmi idarələrinin nailiyyətlərini əks etdirən kitab sərgisi təşkil olunmuşdu.
Bölmənin akademik-katibi Musa Musayev hesabat məruzəsi ilə çıxış edərək, il ərzində bölmənin elmi dairələrində görülmüş işlər, əldə olunmuş nailiyyətlər barədə ətraflı məlumat vermişdir. Bildirmişdir ki, 15 problem, 77 mövzu üzrə tədqiqatlar aparılmış, 21 mühüm elmi nəticə alınmışdır. AMEA-nın Botanika İnstitutunda akademik Cəlal Əliyevin rəhbərliyi ilə aparılan, müasir molekulyar-genetika və fiziki-kimyəvi biologiya üzrə fundamental tədqiqatların nəticələri ölkəmizdə bu elmin inkişafında mühüm rol oynamışdır. Görkəmli alimin elmi və elmi-təşkilati fəaliyyəti FAO, SİMMİT, İKARDA, JCKTSAT və s. beynəlxalq seleksiya mərkəzləri tərəfindən yüksək qiymətləndirilmişdir.
Eyni zamanda qeyd edilmişdir ki, 14 monoqrafiya, 9 elmi-kütləvi kitabça, 392 məqalə - onlardan 83-ü xaricdə çap edilmişdir. 7 müəlliflik şəhadətnaməsi və patent alınmışdır. Bölmə alimləri beynəlxalq təşkilatların (NATO, BENSİF, SOROS və s. ) 30-dan çox qrantına layiq görülmüşlər. 4 doktorluq, 12 namizədlik, ümumiyyətlə isə, bölmə institutlarının ixtisaslaşdırılmış müdafiə şuralarında 18 ixtisas üzrə 11 doktorluq və 40 namizədlik dissertasiyası müdafiə olunmuşdur.
Bölmənin illik fəaliyyəti müsbət qiymətləndirilmişdir.
İclasda AMEA-nın prezidenti, akademik Mahmud Kərimov iştirak etmişdir.
Bölmənin digər xəbərləri
