AMEA-nın Humanitar Elmlər Bölməsi bu ilin birinci yarısı üzrə hesabat verib
Bakı, 5 iyul, AZƏRTAC
Azərbaycan Milli Elmlər Akademiyası (AMEA) Humanitar Elmlər Bölməsinin Elmi şurasının iclası keçirilib.
Akademiyadan AZƏRTAC-a bildirilib ki, tədbiri Humanitar Elmlər Bölməsinin Elmi şurasının sədr müavini akademik Teymur Kərimli açaraq gündəlikdə qoyulan məsələlərlə iştirakçıları tanış edib.
Elmi şuranın iclasında Humanitar Elmlər Bölməsinin elmi müəssisələrinin 2024-cü ilin birinci yarısı üzrə elmi və elmi-təşkilati fəaliyyətinin yekunlarına dair hesabat dinlənilib. Qeyd olunub ki, 2024-cü ilin birinci yarısında Azərbaycan Respublikası Prezidentinin fərman və sərəncamları, Nazirlər Kabinetinin tapşırıqları, eləcə də AMEA Rəyasət Heyətinin qərarları Humanitar Elmlər Bölməsi və onun elmi tədqiqat müəssisələri tərəfindən məsuliyyətlə icra olunub.
Qeyd olunub ki, Humanitar Elmlər Bölməsinin elmi müəssisələri tərəfindən 45 kitab (3-ü xaricdə), 31 monoqrafiya (3-ü xaricdə), 872 məqalə (158-i xaricdə), 258 tezis (156-sı xaricdə) nəşr olunub. İmpakt faktorlu jurnallarda əməkdaşların 8 məqaləsi işıq üzü görüb. Ümumilikdə 47 respublika və 17 beynəlxalq miqyaslı tədbir keçirilib. Hesabat dövründə 21 nəfər fəlsəfə doktoru, 10 nəfər elmlər doktoru hazırlığı üzrə dissertasiya müdafiə edib. Elmi müəssisələrdə fəaliyyət göstərən 36 alim xarici ölkələrdə keçirilən tədbirlərdə Azərbaycan humanitar elmini uğurla təmsil edib.
Bölmənin və onun elmi müəssisələrinin hesabatı yekdilliklə qəbul edilib.
Elmi şuranın iclasında bir sıra kadr məsələlərinə də baxılıb. Eləcə də elmi müəssisələrin müraciətinə əsasən, AMEA-da təhsil alan doktorant və dissertantların mövzularında bir sıra dəyişikliklər edilib.
Bölmənin digər xəbərləri
