AMERİKA MÜTƏXƏSSİSLƏRİ AZƏRBAYCAN ENERGETİKLƏRİNİN PEŞƏKARLIĞINI YÜKSƏK QİYMƏTLƏNDİRMİŞLƏR
“Azərbaycan energetiklərinin yüksək mühəndis-texniki səviyyəsi bizi heyran edir. Çətinliklərə baxmayaraq, onlar öz peşəkarlıq keyfiyyətlərini lazımi səviyyədə saxlamış və energetikanın tərəqqisi ilə ayaqlaşmağa çalışırlar”. Bu fikri ABŞ-ın “Berns ənd Roy enterprayz inkorporeyted” məsləhət şirkətinin yüksək vəzifəli təmsilçiləri Nabil Keddis və Çorç Erdvards söyləmişlər.
“Azərenerji” SC-nın mətbuat xidmətindən AZƏRTAC-a bildirmişlər ki, ABŞ-ın aparıcı şirkətlərindən biri olan bu şirkət “Şimal” DRES-də 400 meqavat gücündə buxar-qaz qurğusu tikintisi layihəsinin məsləhətçisidir. Amerika mütəxəssisləri gələcəkdə də Azərbaycanda layihələrdə iştirak etmək niyyətindədirlər. Onlar hesab edirlər ki, Azərbaycan rəhbərliyinin milli energetika sisteminin inkişafına diqqəti, bu cür layihələrdə iştirak etmək istəyən xarici firmalar üçün faydalı və əlverişli şərait yaradılması əcnəbi sərmayəçiləri həvəsləndirir.
Corc Edvards AZƏRTAC-ın müxbiri ilə söhbətində demişdir: - Sirr deyil ki, “Şimal” DRES-in yüksək gərginlikli elektrikötürmə xətləri ötən əsrin ortalarında çəkilmişdi və hazırda lazımi səviyyədə işləyə bilmir. “Azərenerji” SC mütəxəssislərinin indi burada gördükləri işlərin sürət və keyfiyyəti bizi heyrətə gətirdi. Məncə, bu, Azərbaycan energetiklərinin öz işlərinə vicdanlı və peşəkar münasibətini sübut edir”.
Bölmənin digər xəbərləri
