Aqrar sahədə yeni strateji mərhələ Azərbaycanın dayanıqlı inkişaf modelini daha da gücləndirəcək - ŞƏRH
Bakı, 12 iyun, AZƏRTAC
Azərbaycan Prezidenti İlham Əliyevin 2026-cı il mayın 25-də kənd təsərrüfatı məsələlərinə həsr olunmuş müşavirədə səsləndirdiyi strateji yanaşmalar ölkənin aqrar sektorunun gələcək inkişaf istiqamətlərini müəyyən edən mühüm dövlət siyasəti sənədi kimi qiymətləndirilməlidir. Dövlət başçısının çıxışında ərzaq təhlükəsizliyinin təmin olunması, aqrar istehsalda rəqəmsallaşmanın genişləndirilməsi, torpaq ehtiyatlarının elektron idarə edilməsi, süni intellekt və peyk texnologiyalarının tətbiqi, su resurslarından səmərəli istifadə və urbanizasiya proseslərinin düzgün tənzimlənməsi kimi məsələlərin ön plana çıxarılması Azərbaycanın uzunmüddətli iqtisadi inkişaf strategiyasının mühüm tərkib hissəsidir.
Bu fikirləri AZƏRTAC-a açıqlamasında Milli Məclisin deputatı Zaur Şükürov səsləndirib.
Deputat bildirib ki, son illər Azərbaycan kənd təsərrüfatının inkişafına yalnız iqtisadi artım amili kimi deyil, milli təhlükəsizlik, sosial sabitlik və regional inkişaf baxımından kompleks yanaşma nümayiş etdirir. Bu yanaşmanın əsas məqsədi daxili istehsal imkanlarını artırmaqla ölkənin ərzaq təminatını daha da gücləndirmək və qlobal çağırışlara qarşı dayanıqlılığı yüksəltməkdir.
Zaur Şükürov qeyd edib ki, dünyada müşahidə olunan geosiyasi dəyişikliklər, beynəlxalq logistika zəncirlərində baş verən pozuntular, iqlim dəyişiklikləri və qlobal ərzaq bazarlarında qeyri-sabitlik kənd təsərrüfatının strateji əhəmiyyətini daha da artırır. Bu şəraitdə kənd təsərrüfatında müasir idarəetmə və innovativ texnologiyaların tətbiqi artıq seçim deyil, zərurətə çevrilib.
Deputat vurğulayıb ki, Prezident İlham Əliyevin müşavirədə xüsusi diqqət çəkdiyi məsələlərdən biri torpaq fondunun daha səmərəli idarə olunması və torpaqların elektron pasportlaşdırılmasıdır. Bu mexanizm torpaq resurslarının istifadəsinə nəzarətin gücləndirilməsi, məhsuldarlığın artırılması və kənd təsərrüfatında planlaşdırmanın daha effektiv qurulması baxımından mühüm əhəmiyyət daşıyır.
Onun sözlərinə görə, aqrar sektorda süni intellekt və peyk texnologiyalarının tətbiqi fermerlər üçün yeni imkanlar yaradır. Müasir rəqəmsal sistemlər vasitəsilə torpaqların vəziyyətinin monitorinqi, suvarma proseslərinin optimallaşdırılması, məhsul proqnozlarının hazırlanması və risklərin idarə olunması daha operativ həyata keçirilə biləcək: “İyunun 11-də Milli Məclisdə parlamentin Aqrar siyasət, İqtisadi siyasət, sənaye və sahibkarlıq, Təbii ehtiyatlar, energetika və ekologiya komitələrinin Azərbaycan Respublikasının Kənd Təsərrüfatı Nazirliyi ilə birgə təşkil etdiyi dinləmələr də dövlət başçısının müəyyən etdiyi strateji prioritetlərin qanunvericilik və institusional müstəvidə dəstəklənməsinə xidmət edir. Dövlət Proqramı çərçivəsində kənd təsərrüfatında innovativ texnologiyaların tətbiqi, məhsuldarlığın yüksəldilməsi, emal sənayesinin inkişafı, əlavə dəyər yaradan istehsalın genişləndirilməsi və ixrac imkanlarının artırılması əsas hədəflər kimi müəyyən olunub”.
Zaur Şükürov bildirib ki, kənd yerlərində həyat səviyyəsinin yüksəldilməsi və məşğulluğun artırılması dövlət siyasətinin əsas istiqamətlərindən biri olaraq qalır. Son illərdə regionlarda yol, su, enerji və sosial infrastruktur layihələrinin həyata keçirilməsi kənd əhalisinin rifahına birbaşa təsir göstərib.
Deputat əlavə edib ki, urbanizasiya proseslərinin düzgün idarə olunması da dövlət siyasətinin mühüm istiqamətlərindən biridir. Regionlarda iqtisadi fəallığın artırılması, kənd təsərrüfatı biznesinin inkişafı, kənd turizminin genişləndirilməsi və müasir yaşayış mühitinin yaradılması əhalinin iri şəhərlərə həddindən artıq axınının qarşısının alınmasına töhfə verir.
“Azərbaycanın aqrar sahədə həyata keçirdiyi ardıcıl siyasət göstərir ki, ərzaq təhlükəsizliyi, regional inkişaf, ekoloji balans və sosial rifah bir-birindən ayrılmaz istiqamətlərdir. Prezident İlham Əliyevin müəyyən etdiyi yeni strateji yanaşmalar ölkəmizin kənd təsərrüfatını daha rəqabətqabiliyyətli edəcək, kənd əhalisinin rifahını yüksəldəcək və Azərbaycanın dayanıqlı inkişaf modelini daha da gücləndirəcək”, – deyə deputat vurğulayıb.
Bölmənin digər xəbərləri
